Kā ka luna hoʻoponopono nota: Unuhi ʻia na Ākea Kahikina. Click here to read this article in English.
Hiki i nā kamaʻāina ma Hawaiʻi nei ke kuhi aku i kahi kau makani pāhili maʻamau ʻole i kēia makahiki, wahi a nā luna nui o ka National Oceanic and Atmospheric Administration ma ka Pōʻalua.
Wānana nā loea ma NOAA, me ka huʻe ʻana i ko lākou ʻike kilo no ke kau makani pāhili o ka makahiki 2024, e loaʻa ana hoʻokahi a ʻehā mau makani pāhili ma ka poho o ka Pakipika Waena.
ʻO Christopher Brenchley, ka luna o ka Central Pacific Hurricane Center a ka National Weather Service, nāna nō i wehewehe maila, ʻo ka nāwaliwali o ke ʻano o kēia kau, ʻo ia nō ka hopena a nā wai e anuanu ana i kokoke i Kapikoowākea, ʻo ia paha ka mea e hoʻopuka nei i ke kūlana he La Nina. Hiki i kēia ʻano kūlana ke hoʻonui aʻe i ka holo makani ma Hawaiʻi a me ka Pakipika Waena, a ʻo ka hoʻēmi ihola nō ia o nā makani pāhili.
Wahi a nā loea, ʻo ka pahiki o ka hoʻomohala ʻia ʻana o La Nina, e hoʻonui ʻia ana paha mai ka waena o ke kauwela a ma hope aku.
ʻO kā NOAA wānana, he māka ia nāna e hōʻike aku i kekahi hoʻololi nui ma nā kūlana kūikawā ma ka Pakipika, wahi a Brenchley.
Ua wehewehe ʻia ke kau o ka makahiki 2023 me nā kūlana he El Nino, a ua manaʻo ʻia, he ʻano maʻamau kona. Ma kēlā wā, ua loaʻa ʻehā makani pāhili ma ka Pakipika Waena, a ʻo kekahi o ia mau makani pāhili — ʻo Dora kona inoa — ua holo laulā mai hikina a i komohana o ka Pakipika.
I loko nō o ke kuhi ʻia o ka nāwaliwali o kēia kau, ʻaʻole i paʻa loa kahi mea.
Ma ke kau makani pāhili o ka makahiki 2020, ua kuhi ʻia kona ʻano nāwaliwali, akā, ʻo ka makani pāhili ʻo Douglas, ʻo ia nō ka ikaika loa o ka ʻino i holo aku, mai hikina a i waenakonu o ka Pakikpika, mai ka makahiki 2018 aku, a ua hala kokoke loa ia ʻino ma waho aʻe o ka pae ʻāina.
“I loko nō o ke kuhi ʻia ʻana o ka nāwaliwali, ʻo kēia nō ka wā e hoʻomākaukau ai,” wahi a John Bravender, he Warning Coordination Meteorologist ma ka Central Pacific Hurricane. “ʻAʻole hiki ke hoʻomaopopo leʻa ʻia, e like ana kēia ʻano me ko ka makahiki 2017, ka wā i nele ai ka makani ma ke kai, a i ʻole ko ka makahiki 2020, ka wā i hala kokoke loa ai ʻo Douglas ma waho pono aʻe o kākou ma ka ʻaoʻao ʻākau.”
Ua paipai mai ʻo Brenchley i nā kamaʻāina, e hoʻomākaukau pono kākou a e hoʻolako i nā lako ulia pōpilikia no nā lā he 14.
“Ma ka ʻalo ʻana i kahi makani pāhili, he koʻikoʻi ka hoʻomākaukau ʻana i kēia kau, a ʻaʻole e kali no kekahi kau e kuhi ʻia ana ka makani ikaika,” wahi a Brenchley. “ʻO ka hana nui a me ka hana iki e hana ʻia, he mea ia e ʻonipaʻa ai ke kaiāulu, i loko nō o ka makani ʻino nāna e hoʻopilikia aku i ke kaiāulu.”
ʻO Kevin Kodama, he Senior Service Hydrologist ma ka Weather Forecast Office a ka National Weather Service ma Honolulu, nāna nō i paipai pū i kēlā manaʻo o luna.
“Hiki i hoʻokahi makani ʻino ke hoʻololi ʻokoʻa i kou ola, kou ʻohana, a me kou kaiāulu,” wahi āna. “Ma mua o ka hoʻomaka ʻana o ke kau makani pāhili o kēia makahiki, paipai ka mokuʻāina ʻo Hawaiʻi iā kākou e nānā pono i nā pilikia makani pāhili a e loaʻa mai kahi hoʻolālā ulia pōpilikia.”
Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.
