ఖమ్మంలో జరిగిన కాంగ్రెస్ బహిరంగసభ సూపర్ సక్సెస్ అయ్యిందనే అనుకోవాలి. వైరా రోడ్డులోని 150 ఎకరాల స్ధలంలో నిర్వహించిన సభకు జనాలు బాగానే వచ్చారు. జనాలు రావటం ఒకఎత్తు, స్పందన మరోఎత్తు. ఈ సభలో జనాల హాజరు, స్పందన రెండూ బాగానే ఉన్నాయి. ఎందుకంటే రెండు కారణాలు. మొదటిదేమో సీఎల్పీ నేత భట్టి విక్రమార్క పీపుల్స్ మార్చ్(పాదయాత్ర) ముగింపు సభ కావటం. ఇక రెండోదేమో మాజీ ఎంపీ పొంగులేటి శ్రీనివాసరెడ్డి రాహూల్ గాంధి సమక్షంలో కండువా కప్పుకోవటం.

నిజానికి బహిరంగ సభ సక్సెస్ లో ఎక్కువ క్రెడిట్ పొంగులేటికే ఇవ్వాలి. రాహూల్ మాట్లాడింది సుమారు అర్ధగంటే అయినా జనాల్లో మంచి స్పందన కనబడింది. ఖమ్మంసభ కాంగ్రెస్ భవిష్యత్తు మీటింగులకు మంచి జోష్ నింపేదే అనటంలో సందేహంలేదు. బీఆర్ఎస్, బీజేపీలను టార్గెట్ చేస్తు రాహుల్ మాట్లాడింది తక్కువే. రెండుపార్టీలు ఒకటే అని రాహూల్ ఆరోపించారు. కాంగ్రెస్ కు ఓట్లేయమన్నారు, రాబోయే ఎన్నికల్లో అధికారంలోకి రాబోయేది కాంగ్రెస్ పార్టీయే అని చెప్పారు.

నిజానికి కాంగ్రెస్ పార్టీ అంటే నేతల్లోకన్నా క్యాడర్ తో పాటు జనాల్లోనే ఎక్కువ అభిమానముంది. అధికారంలో ఉన్నపుడు అన్నీ పదవులను అనుభవించి కూర్చున్న కొమ్మనే నరికేసింది పెద్ద నేతలే కానీ క్యాడర్ కాదు. పార్టీ మీద అభిమానంతో జెండాలు మోసినవాళ్ళు, బ్యానర్లు కట్టినవాళ్ళలో ఎక్కువమంది ఇంకా పార్టీలోనే ఉన్నారు.

ఇలాంటి వాళ్ళకు పార్టీ అధికారంలోకి రావాలని బలంగా ఉంది. అయితే పార్టీని అధికారంలోకి తీసుకురావాలని నేతల్లో ఎంతమందికి ఉందన్నదే అసలైన ప్రశ్న. ఎందుకంటే చాలామంది సీనియర్లలో చాలామందితో పడదు. బలమైన వర్గం పీసీసీ అధ్యక్షుడు రేవంత్ రెడ్డిని బహిరంగంగానే వ్యతిరేకిస్తున్న విషయం అందరికీ తెలిసిందే. ఉత్తమకుమార్ రెడ్డి, కోమటిరెడ్డి వెంకటరెడ్డి, జగ్గారెడ్డి లాంటి వాళ్ళు రేవంత్ ను పదేపదే టార్గెట్ చేస్తు మాట్లాడుతున్న విషయం అందరు చూస్తున్నదే. ఇలాంటి నేతల వైఖరి చూస్తున్నపుడే వీళ్ళ చిత్తశుద్దిపై అనుమానాలు పెరిగిపోతుంటాయి.