వైసీపీ రెబల్ ఎంపీ రఘురామకృష్ణంరాజు పచ్చకండువా కప్పేసుకున్నట్లేనా ? తాజా పరిణామాలు చూస్తుంటే అలాగే అనిపిస్తోంది. నార్త్ అమెరికా తెలుగు అసోసియేషన్(నాటా) నిర్వహిస్తున్న కార్యక్రమాలకు అతిధిగా రఘురాజు హాజరయ్యారు. టెక్సాస్ రాష్ట్రంలోని డల్లాస్ లో నాటా సమావేశాలు జరుగుతున్నాయి. నిర్వాహకులు అనేకమంది ప్రముఖులను ప్రతిఏడాది ఆహ్వానిస్తుంటారు. అలాగే ఈ ఏడాది నరసాపురం వైసీపీ రెబల్ ఎంపీని కూడా ఆహ్వానించారు. ఈ సమావేశాల్లో పాల్గొన్న రఘురాజు మెడలో పచ్చకండువా వేసుకుని తిరగటం అందరి దృష్టిని ఆకర్షించింది.

విషయం ఏమిటంటే మెడలో పచ్చకండువా వేసుకున్నంత మాత్రాన రాజు టీడీపీలో చేరిపోయినట్లు కాదు. అయితే రఘురాజు డల్లాస్ కు చేరుకున్న దగ్గర నుండి ఆయనకు స్వాగతం పలికి కూడా ఉంటున్నవారిలో అత్యధికులు తెలుగుదేశంపార్టీ సానుభూతిపరులేనట. నిజానికి రఘురాజకు ఆహ్వానం అందటం కూడా వాళ్ళ చలవే అని ప్రచారం జరుగుతోంది. జగన్మోహన్ రెడ్డితో వ్యక్తిగతంగా చెడినదగ్గర నుండి రెబల్ ఎంపీ వైసీపీకి దూరమైపోయిన విషయం తెలిసిందే. అప్పటినుండి టీడీపీ కండువా కప్పుకోవాలని తెగ ప్రయత్నిస్తున్నారు. 

వచ్చేఎన్నికల్లో అయితే టీడీపీ లేకపోతే జనసేన తరపున పోటీచేయటానికి రాజు రెడీ అవుతున్నారు. మళ్ళీ నరసాపురం నుండి ఎంపీగా పోటీచేసి గెలిస్తేనే రఘురాజుకు భవిష్యత్తుంటుంది. లేకపోతే అంతే సంగతులు. జగన్ తో సరిపోక దూరమైన ఎంపీ అలా కామ్ గా ఉండుంటే సరిపోయేది. కానీ ఎంపీ అలాగ ఉండకుండా ప్రభుత్వాన్ని కెలకటం మొదలుపెట్టారు. అయితే ఎవరు పట్టించుకోలేదన్న కోపంతో తర్వాత డైరెక్టుగా జగన్ పైనే ఆరోపణలు మొదలుపెట్టారు.

చంద్రబాబునాయుడు, ఎల్లోమీడియా మద్దతుతో జగన్ కు వ్యతిరేకంగా ఎంపీ రెచ్చిపోవటంతో సీఐడీ కేసులు నమోదుచేసి విచారించిన విషయం తెలిసిందే. ఆ విచారణ సందర్భంగానే తనను తీవ్రంగా కొట్టారని, హత్యాయత్నం కూడా జరిగిందని కోర్టులో కేసువేశారు. లోక్ సభలో ఫిర్యాదుచేశారు. అప్పటినుండి రాజు ఢిల్లీలో కూర్చునే జగన్ పై నోటికొచ్చినట్లు ప్రతిరోజు మాట్లాడుతున్నారు. ఈ నేపధ్యంలోనే ఎంపీగా ఇపుడు తనకున్న ప్రివిలేజెస్ కంటిన్యు అవ్వాలంటే మళ్ళీ ఎంపీగా గెలవాల్సిందే. లేకపోతే ఏదో పద్దతిలో ఏదో పార్టీ నుండి రాజ్యసభకైనా నామినేట్ కావాలి. ఏదీ కాకపోతే మాత్రం రఘురాజు పరిస్ధితి ఇబ్బందే.