వారాహియాత్ర మొదలైన దగ్గర నుండి జనసేన అధినేత పవన్ కల్యాణ్ బాగా హైలైట్ చేస్తున్న పాయింట్లలో కీలకమైనది ఏమిటంటే వైసీపీని గెలవనివ్వనని. మొదటగా ఉభయగోదావరి జిల్లాల్లోని 34 సీట్లలో ఒక్కటంటే ఒక్క నియోజకవర్గంలో కూడా వైసీపీని గెలవనిచ్చేదిలేదని చాలెంజ్ చేశారు. మళ్ళీ ఇందులో కూడా కాకినాడలో ద్వారంపూడి చంద్రశేఖరరెడ్డి రాబోయే ఎన్నికల్లో ఎలా గెలుస్తారో చూస్తానంటు భీష్మ ప్రతిజ్ఞ చేశారు. అంతటి ఆగకుండా ద్వారంపూడి గనుక గెలిస్తే పవన్ కల్యాణ్ అనే తన పేరును మార్చుకుంటానని శపథం చేశారు.

నిజానికి ప్రజాస్వామ్యంలో ఇలాంటి చాలెంజులు, ప్రతిజ్ఞలు పనిచేయవని పవన్ కు ఇంకా అర్ధంకాలేదు. ఇలాంటి ప్రతిజ్ఞలే 2019 ఎన్నికల్లో కూడా చేసి బోర్లాపడ్డారు. సరే ఆ విషయాన్ని వదిలేస్తే వైసీపీని ఒక్కనియోజకవర్గంలో కూడా గెలవనిచ్చేది లేదన్నారు బాగానే ఉంది. మరి జనసేన ఎన్నిసీట్లలో గెలుస్తుందో  ఎందుకు చెప్పలేదు. అసలు ఎన్నిసీట్లలో పోటీచేస్తుందో కూడా తెలీని పవన్ వైసీపీ గెలుపు గురించి మాట్లాడటమే విచిత్రంగా ఉంది.

తాను పోటీచేయబోయే నియోజకవర్గాన్ని ప్రకటించేందుకే భయపడుతున్నారు. ఎందుకంటే తాను పోటీచేయబోయే నియోజకవర్గాన్ని ఇపుడే ప్రకటిస్తే తనను ఓడించేందుకు ఇఫ్పటినుండే జగన్మోహన్ రెడ్డి దృష్టిపెడతరాట.   అంటే రాబోయే ఎన్నికల్లో తాను గెలిచేదే అనుమానం. పైగా ఈ విషయాన్ని యాత్రలోనే చెప్పారు. వచ్చేఎన్నికల్లో తాను గెలుస్తానో లేదో..తనకు ఓట్లేస్తారో లేదో అంటు పదిసార్లు చెప్పుంటారు.

ముందు తాను పోటీచేసే నియోజకవర్గంలో ఎలా గెలవాలో చూసుకోకుండా, పోటీచేసే నియోజకవర్గాల్లో పార్టీ గెలుపు గురించి ఆలోచించకుండా వైసీపీ గెలుపు విషయం పవన్ కు ఎందుకు ? ముందు ఇంట గెలిచి తర్వాత రచ్చ గెలవాలని పెద్దలు చెప్పే సామెత ఒకటుంది. బహుశా ఆ సామెత పవన్ విన్నట్లు లేదు. అందుకనే ఎంతసేపు జగన్ పైన వైసీపీ గెలుపుపైన నోరుపారేసుకుంటున్నారు. నెటిజన్లు కూడా సోషల్ మీడియాలో ఇదే చెబుతున్నారు. ముందు జనసేన గెలుపు సంగతి చూసుకోమని హితవుచెబుతున్నారు. ఎవరు గెలవాలన్నా ఓట్లేయాల్సింది జనాలే. జనాలు ఓట్లేస్తేనే గెలుస్తారు లేకపోతే లేదు. ఇంతోటిదానికి పవన్ ఎందుకు చాలెంజులు చేస్తున్నారో అర్ధంకావటంలేదు.