خیبرپختونخوا میں شدید بارشیں، بچے، خاتون سمیت 5 افراد جاں بحق

خیبرپختونخوا میں شدید بارشوں کے دوران خواتین، بچے سمیت 5 افراد جاں بحق ہو گئے۔

لکی مروت میں چھت گرنے سے ایک بچہ جاں بحق

خیبرپختونخوا کے ضلع لکی مروت میں طوفانی ہوائوں کے ساتھ موسلادھار بارش ہوئی، بارشوں کے بعد متعدد خواتین اور بچے زخمی ہوئے ہیں، اسی دوران گھروں کی چھتیں اور دیواریں بھی گر گئیں۔

ہسپتال ذرائع کے مطابق لکی مروت کے علاقے سرائے نورنگ میں ایک بچہ جاں بحق ہو گیا جبکہ سات افراد زخمی ہوئے ہیں۔ جاں بحق اور زخمیوں کو سرائے نورنگ ہسپتال منتقل کر دیا گیا ہے جبکہ ضلع بھر کے ہسپتالوں میں ایمرجنسی نافذ کر دی گئی ہے۔

بنوں میں چھتیں اُڑ گئیں، خاتون سمیت تین افراد جاں بحق

دوسری طرف ضلع بنوں میں ایک بار پھر تیز بارش اور طوفان نے 8 مختلف مقامات پر گھروں کی دیواریں گرا دیں اور کچھ مقامات پر چھتوں کو اڑا دیا جن میں سوارنی، ککی، پکا بچک، ہوید ، چاند ماری، برگے پمپ، نیو سبزی منڈی، پیر خیل ککی کے علاقے شامل ہیں۔

ہسپتال انتظامیہ کے مطابق مختلف علاقوں میں چھتیں گرنے کے باعث خاتون سمیت تین افراد زندگی کی بازی ہار گئے،

ریسکیو ذرائع کے مطابق مجموعی طور پر 54 افراد زخمی ہوگئے ہیں جس میں بچوں اور خواتین کی تعداد زیادہ ہے، زخمیوں میں مرد بھی شامل ہیں جنہیں فوری طور پر طبی امدادکے لیے ہسپتال منتقل کر دیا گیا ہے۔

دوسری جانب کمشنر بنوں ڈویژن کا کہنا ہے کہ واقعات کے بعد ضلعی انتظامیہ کو الرٹ کر دیا ہے، طوفانی بارشوں میں ہونے والے نقصانات کا جائزہ لیا جارہے جبکہ امدادی سرگرمیاں جاری ہے اور متاثرین کی ریلیف کے لیے تمام وسائل بروئے کار لائے جارہے ہیں۔

یاد رہے ایک ہفتہ قبل بھی تیز طوفانی بارشوں نے ضلع بنوں میں تباہی مچا دی تھی جس میں 16 افراد جاں بحق جبکہ 150 سے زائد افراد شدید زخمی ہوگئے تھے۔

پی ڈی ایم اے

پی ڈی ایم اے کی رپورٹ کے مطابق ڈی آئی خان، مانسہرہ میں بھی بارشوں سے افراد جاں بحق ہوئے جبکہ 71 افراد زخمی ہوئے ہیں۔

خضدار میں بھی موسلا دھار بارش

اُدھر بلوچستان کے ضلع خضدار کے مختلف علاقوں میں گرج چمک کے ساتھ موسلا دھار بارش ہوئی جو کہ تسلسل کے ساتھ جاری ہے۔