خیبر پختونخوا کو ترقی،امن کا گہوارہ بنا کر رہیں گے، وزیراعظم شہباز شریف

وزیراعظم شہبازشریف نے کہا ہے کہ خیبر پختونخوا کو ترقی اور امن کا گہوارہ بنا کر رہیں گے، گزشتہ حکومت نے خیبر پختونخوا کی ترقی کو یکسر نظر انداز کیا،بجٹ 2023-24 میں ضم شدہ قبائلی اضلاع کی ترقی کیلئے خصوصی اقدامات شامل کئے ہیں۔

ان خیالات کااظہار وزیراعظم نے خیبر پختونخوا سے تعلق رکھنے والی لیگی قیادت سے گفتگو کرتے ہوئے کیا۔ملاقات میں وزیر پارلیمانی امور مرتضی جاوید عباسی، مشیرِ وزیرِ اعظم انجنیئر امیر مقام، سینیٹر ثاقب شاہ، کیپٹن محمد صفدر، سجاد احمد، شہاب الدین خان، جمشید محمد، اورنگزیب نلوٹھہ نے شرکت کی۔

ملاقات میں موجودہ ملکی سیاسی صورتحال پر گفتگو کی گئی۔خیبر پختونخوا کے آئندہ انتخابات پر تفصیلی مشاورت بھی گفتگو کا حصہ رہی۔

ملاقات میں شرکاء نے وزیرِ اعظم کو بجٹ 2023-24 میں خیبرپختونخوا اور قبائلی اضلاع کی ترقی کیلئے اقدامات کی شمولیت پر خراجِ تحسین پیش کیا۔

اس موقع پر وزیراعظم نے کہا کہ خیبر پختونخوا کو ترقی اور امن کا گہوارہ بنا کر رہیں گے۔ گزشتہ حکومت نے خیبر پختونخوا کی ترقی کو یکسر نظر انداز کیا۔ بجٹ 2023-24 میں ضم شدہ قبائلی اضلاع کی ترقی کیلئے خصوصی اقدامات شامل کئے ہیں۔یقینی بنائیں گے کہ وفاقی حکومت کے صحت و تعلیم کے منصوبوں سے خیبر پختونخوا کے عوام بھرپور مستفید ہوں۔

شہباز شریف نے کہاکہ خیبر پختونخوا کے باصلاحیت نوجوانوں کو آسان شرائط پر قرض اور لیپ ٹاپس فراہم کریں گے۔ خیبر پختونخوا کے کسانوں کو معیاری بیج اور برقت کھاد کی فراہمی کے ساتھ ساتھ جدید ٹیکنالوجی سے لیس کریں گے۔ سرحدی اضلاع میں تجارت میں سہولت فراہم کرکے لوگوں کی معاشی مشکلات دور کریں گے۔