بلوچستان عوامی پارٹی“باپ“ نے بجٹ اجلاس کےبائیکاٹ کااعلان کردیا

وفاقی حکومت سے ناراض بلوچستان عوامی پارٹی“ باپ “ کے صدرعبدالقدوس بزنجو نے بجٹ اجلاس کے بائیکاٹ کا اعلان کردیا۔

وزیراعلیٰ بلوچستان اورصدر بی اے پی عبدالقدوس بزنجو نے وفاقی بجٹ اجلاس کے بائیکاٹ کا اعلان کرتے ہوئے کہا کہ بلوچستان عوامی پارٹی وفاقی بجٹ سیشن کاحصہ نہیں بنے گی۔

انہوں نے کہا کہ بی اے پی اراکین قومی اسمبلی اورسینیٹرزوفاقی بجٹ سیشن میں شرکت نہیں کریں گے، بی اے پی کے اراکین قومی اسمبلی و سینٹ کو اجلاس میں شرکت نہ کرنے کی واضح ہدایات جاری کر دی گئی ہیں۔

یہ بھی پرھیں:۔قومی اقتصادی کونسل کے اجلاس میں شرکت پربلوچستان کے صوبائی وزیر نور محمد دمڑ برطرف

دوسری جانب عبدالقدوس بزنجوکےفیصلےپربلوچستان عوامی پارٹی کےارکان پارلیمنٹ نے اعتراض کرتے ہوئے پارٹی صدرکوبجٹ سیشن کابائیکاٹ نہ کرنےکامشورہ دیا ہے۔

باپ پارٹی کے ارکان نے تجویزدی کہ بجٹ اجلاس کےدوران ایوان میں رہ کراحتجاج کیا جائے، بائیکاٹ کاکوئی تاثرنہیں پڑےگا،احتجاج کیاجائے۔

ارکان نےکہا کہ باپ کےسیکرٹری جنرل منظورکاکڑ،عبدالقدوس بزنجوکواپنی تجاویزسےآگاہ کریں گے۔

یاد رہے کہ بلوچستان سے تعلق رکھنے والے راکین اسمبلی نے گزشتہ روزہونے والے اقتصادی رابطہ کمیٹی کے اجلاس کا بھی بائیکاٹ کیا تھا،اورقومی اقتصادی کونسل کے اجلاس میں شرکت کی وجہ سے وزیراعلیٰ بلوچستان میرعبدالقدس بزنجونے سینئرصوبائی وزیر نور محمد دمڑ پربرہمی کا اظہارکرتے ہوئے وزارت ترقی ومنصوبہ بندی کا قلمدان وآپس لے لیا تھا۔

واضح رہے کہ وفاقی بجٹ کل پارلیمنٹ ہاؤس میں پیش کیا جائے گا جس کے لیے قومی اسمبلی کا اجلاس کل سہہ پہر 4 بجے طلب کر لیا گیا ہے۔