ارشد شریف قتل ازخود نوٹس کیس میں عمران خان کو بھی شامل تفتیش کرنیکی درخواست

کینیا میں قتل کئے گئے سینئر صحافی ارشد شریف کی والدہ نے چیئرمین پی ٹی آئی عمران خان کو سپریم کورٹ کے ازخود نوٹس کیس میں شامل تفتیش کرنے کی درخواست دائر کردی۔

ایڈووکیٹ شوکت عزیز صدیقی کے ذریعے دائر کی گئی متفرق درخواست میں مقتول صحافی ارشد شریف کی والدہ نے مؤقف اختیار کیا ہے کہ چیئرمین پی ٹی آئی عمران خان، فیصل واوڈا، مراد سعید، سلمان اقبال اور عمران ریاض کو شامل تفتیش کیا جائے۔

درخواست میں عدالت سے استدعا کی گئی ہے کہ ارشد شریف کے قتل سے متعلق ان تمام افراد سے شواہد حاصل کئے جائیں۔ ارشد شریف کی والدہ نے مزید کہا ہے کہ قتل کی تحقیقات پاکستان میں ہونے والی سازش سے شروع کی جائیں، کئی افراد نے ارشد شریف کے قتل کی سازش کے بارے میں جاننے کا دعویٰ کیا ہے۔

ان کا کہنا ہے کہ فیکٹ فائنڈنگ کمیٹی کی رپورٹ اور نہ ہی جے آئی ٹی کی رپورٹ فراہم کی گئی ہے، سپریم کورٹ سے استدعا ہے کہ جے آئی ٹی سربراہ کو 5 افراد کو تحقیقات میں شامل کرنے کا حکم دے۔

درخواست میں یہ بھی کہا گیا ہے کہ عدالت جے آئی ٹی کی رپورٹس فراہم کرنے کا بھی حکم دے۔