وکیل عبدالرزاق شر کے قتل کا مقدمہ عمران خان کیخلاف درج

سپریم کورٹ کے وکیل عبدالرزاق شر کے قتل کا مقدمہ چیئرمین تحریک اںصاف عمران خان کیخلاف درج کرلیا گیا۔

کوئٹہ میں گزشت روز نامعلوم افراد نے فائرنگ کرکے سپریم کورٹ کے وکیل عبدالرزاق شر کو قتل کردیا تھا، وہ عمران خان کیخلاف سنگین غداری کیس میں مدعی تھے۔

کوئٹہ کے تھانہ شہید جمیل کاکڑ میں مقتول عبدالرزاق شر کے بیٹے کی مدعیت میں چیئرمین پی ٹی آئی عمران خان کیخلاف دہشت گردی کی دفعات کے تحت مقدمہ درج کرلیا گیا۔

پولیس کا کہنا ہے کہ مقدمے میں قتل، انسداد دہشت گردی ایکٹ سمیت دیگر دفعات شامل کی گئی ہیں۔

گزشتہ روز وزیراعظم کے مشیر عطاء تارڑ نے پریس کانفرنس کرتے ہوئے بلوچستان کے وکیل کے قتل کا الزام سابق وزیراعظم پر لگاتے ہوئے کہا تھا کہ عبدالرزاق شر ایڈووکیٹ کے قتل کے ذمہ دار عمران خان ہیں۔

عبدالرزاق شر ایڈووکیٹ کے قتل کیخلاف بلوچستان کی عدالتوں میں بائیکاٹ دوسرے روز بھی جاری رہا۔ وکلاء برادری نے کسی بھی کیس کی سماعت میں حصہ نہیں لیا، بار رومز پر سیاہ جھنڈے لہرائے گئے۔

وکلاء تنظیموں نے مطالبہ کیا ہے کہ ایڈووکیٹ عبدالرزاق شر کے قاتلوں کو فوری طور پر گرفتار کیا جائے بصورت احتجاج کا سلسلہ بڑھا دیا جائے گا۔

دوسری جانب چیئرمین پی ٹی آئی کیخلاف بلوچستان ہائیکورٹ میں سنگین غداری کیس کی سماعت بینچ کی عدم دستیابی کے باعث نہ ہو سکی۔ رجسٹرار بلوچستان ہائیکورٹ کے مطابق سنگین غداری کیس کی آئندہ سماعت کی تاریخ کا اعلان بعد میں کیا جائے گا۔