ڈائنامائٹس نے چیلنجرز کو شکست دیکر ویمنز پاکستان کپ جیت لیا

پی سی بی ڈائنامائٹس نے اتوار کو کراچی میں یکطرفہ مقابلے میں پی سی بی چیلنجرز کو 132 رنز سے شکست دے کر ویمنز پاکستان کپ کا ایونٹ جیت لیا۔

45 اوور کے میچ میں، ڈائنامائٹس نے پہلے بیٹنگ کی اور یہ دو نوں سدرہ تھیں، جنہوں نے ان کے لیے سب سے زیادہ رنز بنائے۔ سدرہ نواز نے 13 چوکوں کی مدد سے سنچری اسکور کی اور اپنی ٹیم کے ٹوٹل میں 103 قیمتی رنز کا اضافہ کیا۔

دوسری جانب سدرہ امین نے بھی 38 رنز بنائے، ڈائنامائٹس نے 45 اوورز میں چھ وکٹوں کے نقصان پر 211 رنز بنائے،جس کےجواب میں چیلنجرز کی ٹیم میں صرف جویریہ خان نے کچھ مزاحمت دکھائی اور سب سے زیادہ 28 رنز بنائے۔

باقی تمام بلے باز وقفے وقفے سے آؤٹ ہوتے رہے اور 28.5 اوورز میں صرف 79 رنز پر آل آؤٹ ہو گئے۔ناصرہ سندھو نے صرف پانچ رنز دے کر چار وکٹیں حاصل کیں جبکہ غلام فاطمہ نے تین وکٹیں حاصل کیں۔

سدرہ نواز کو فائنل کی پلیئر آف دی میچ جبکہ سدرہ امین کو ٹورنامنٹ کی بہترین کھلاڑی قرار دیا گیا۔

یاد رہے کہ ڈائنامائٹس نے 2018 میں ملتان میں یکطرفہ فائنل میں ایونٹ بھی جیتا تھا۔