پی ٹی آئی کارکنان کے لیے پیغام ہے کہ وہ تگڑے رہیں،پرویزالہیٰ

پاکستان تحریک انصاف کے مرکزی صدر پرویزالہیٰ کا کہنا ہے کہ پی ٹی آئی کارکنان کے لیے پیغام ہے کہ وہ تگڑے رہیں۔ ایک دم ڈٹ جائیں یہ وقت گزر جائے گا۔

لاہور کی مقامی عدالت میں صحافیوں سے غیررسمی گفتگو میں پرویزالہیٰ کا کہنا تھا کہ پی ٹی آئی سے کہتا ہوں کہ آپ نے ڈٹے رہنا ہے بلکل پیچھے نہیں ہٹنا، ہم حق اور سچ پرہیں۔

پرویزالہٰی کا کہنا تھا کہ میں شروع سے افواج پاکستان کا حامی رہا ہوں، مجھے اپنی عدلیہ پر بھروسہ ہے۔ خود کو بے گناہ قرار دیتے ہوئے انہوں نے کہا کہ میں نےاپنے دور حکومت میں کسی کے خلاف کوئی سیاسی مقدمہ نہیں بنایا تھا۔ یہ برا کر رہے ہیں اور بُرا ہی بھگتیں گے۔

ذرائع کے مطابق رہنما تحریک انصاف کا کہنا تھا کہ میں کوئی پریس کانفرنس نہیں کروں گا، پی ٹی آئی میں ہوں اور اس میں ہی رہوں گا۔

خیال رہے کہ کہ پرویز الٰہی کو کل اینٹی کرپشن نے لاہور سے گرفتار کیا تھا۔ پرویزالٰہی کےخلاف اینٹی کرپشن میں سرکاری ٹھیکوں میں کمیشن لینے کے الزام پر مقدمہ درج ہے۔