برطانوی فوج کے چیف آف جنرل سٹاف پاکستان پہنچ گئے

برطانوی فوج کے چیف آف جنرل سٹاف، جنرل سرپیٹرک سینڈرز برطانیہ اور پاکستان کے درمیان دیرینہ دفاعی تعاون کے معاہدے کے حصے کے طور پر 5 روزہ دفاعی مصروفیات کے دورے پر پاکستان پہنچ گئے۔

برطانوی ہائی کمیشن کے مطابق اپنے دورے کے دوران جنرل سر پیٹرک سینڈرز چیف آف آرمی سٹاف جنرل عاصم منیر سے ملاقات کے علاوہ دیگر دفاعی مصروفیات پر بھی بات کریں گے۔

پاکستان اور برطانیہ کے فوجی تعلقات اور دوستی کی گہرائی اور گرمجوشی، جس کی بنیاد مشترکہ تاریخ اور ’لیونگ برج‘ ڈائیسپورا روابط ہیں، برطانیہ کی جانب سے بہت قدر کی جاتی ہے۔

موجودہ دفاعی تعلقات میں برطانیہ کی رائل ملٹری اکیڈمی سینڈہرسٹ، ایڈوانس کمانڈ اینڈ سٹاف کورس اور رائل کالج آف ڈیفنس سٹڈیز میں تربیت حاصل کرنے والے پاکستانی افسران شامل ہیں۔

جنرل سر پیٹرک سینڈرز کا یہ دورہ پاکستان کے تباہ کن سیلاب کے تقریباً ایک سال بعد آیا ہے جس نے ملک کا تقریباً ایک تہائی حصہ ڈوب گیا اور اندازے کے مطابق 33 ملین افراد متاثر ہوئے۔

برطانیہ کی وزارت دفاع پاکستان کے چیف آف آرمی سٹاف کی درخواست پر سیلاب سے متعلق امدادی کارروائیوں، 8 کشتیوں میں ایئر لفٹنگ اور دس پورٹیبل جنریٹرز کے لیے مدد فراہم کرنے میں براہ راست ملوث تھی۔

موسمیاتی تبدیلی سے متعلق بحرانوں کے جواب میں دوطرفہ فوجی تعاون پر تبادلہ خیال اس دورے کا اہم مرکز ہوگا۔