وزیراعظم شہبازشریف کی اردوان کودوبارہ ترک صدرمنتخب ہونے پرمبارکباد

وزیراعظم شہبازشریف نے عوامی جمہوریہ ترکیہ کے صدررجب طیب اردگان کو دوبارہ صدرمنتخب ہونے کی تاریخی کامیابی پر مبارکباد دیتے ہوئے کہا ہے کہ پاکستان اورترکیہ کے درمیان دوطرفہ تعلقات بلندی کی جانب گامزن رہیں گے ۔

یہ بھی پڑھیں:۔اپوزیشن دھڑن تختہ، اردوان ترک اتنخابات جیت گئے،حامیوں کا جشن

شہبازشریف نے ترک صدر کے نام اپنے تہنیتی ٹویٹ میں نے کہا کہ ترکیہ کے صدر رجب طیب اردگان دنیا کی چند شخصیات میں سے ایک ہیں جن کی سیاست عوامی خدمت پر مرکوز رہی ہے ، وہ دنیا کے مظلوم مسلمانوں کے لئے ایک توانا ستون اور ناقابل تنسیخ حقوق کے لئے پرجوش آواز رہے ہیں ۔

وزیراعظم نے کہاکہ پارلیمانی انتخابات میں ان کی صدارتی اوراے کے پی کی کامیابی مختلف پہلوئوں سے اہمیت کی حامل ہے جو ترک عوام کی طرف سے انکی ولولہ انگیز قیادت پر اعتماد اور بھروسے کی عکاسی کرتی ہے ۔

شہبازشریف نے کہاکہ پاکستان اور ترکیہ کے درمیان دو طرفہ تعلقات بلندی کی جانب گامزن رہیں گے ،میں دونوں ممالک کے عوام کے مابین بہترین بھائی چارے کی مناسبت سے دونوں ملکوں کے درمیان تزویراتی شراکت داری کو مزید وسعت دینے کے لئے ترک صدر کے ساتھ مل کر کام کرنے کا شدت سے منتظر ہوں ۔