آئی سی سی چیئرمین اور چیف ایگزیکٹو آئندہ ہفتے پاکستان کا دورہ کرینگے

انٹرنیشنل کرکٹ کونسل (آئی سی سی) کے چیئرمین گریگ بارکلے اور چیف ایگزیکٹو جیف ایلر ڈائس 2 روزہ دورے پر منگل کو لاہور پہنچیں گے۔

چیئرمین اور چیف ایگزیکٹو آئی سی سی دورہ پاکستان میں پاکستان کرکٹ بورڈ کی مینجمنٹ کمیٹی کے چیئرمین اور آئی سی سی ڈائریکٹر نجم سیٹھی، چیف آپریٹنگ آفیسر بیرسٹر سلمان نصیر اور پی سی بی کے دیگر حکام سے ملاقات کریں گے۔

جیف ایلر ڈائس آئی سی سی کے چیف ایگزیکٹو اور جنرل منیجر کی حیثیت سے پہلے بھی پاکستان آچکے ہیں البتہ گریگ بارکلے کا یہ پاکستان کا پہلا دورہ ہے۔

گریگ بارکلے 15 سال کے عرصے میں پاکستان آنیوالے آئی سی سی کے پہلے چیئرمین ہیں، آخری بار 2008ء میں آئی سی سی کے صدر رے مالی نے پاکستان کا دورہ کیا تھا۔

اکتوبر 2004ء کے بعد یہ پہلا موقع ہے کہ آئی سی سی کے دو ٹاپ آفیشلز پاکستان کرکٹ بورڈ کے ہیڈ کوارٹر کا دورہ کریں گے۔