مجھے ختم کرنے کیلئے 3 افراد کو انگیج کرلیا گیا، شیخ رشید کا دعویٰ

سابق وزیر داخلہ شیخ رشید احمد نے کہا ہے کہ مجھے ختم کرنے کے لیے تین افراد کو انگیج کرلیا گیا ہے، بزدل نہیں ہوں دوستی و دشمنی قبر کی دیوار تک نبھاؤں گا۔

ویڈیو بیان میں سابق وفاقی وزیر داخلہ نے کہا کہ 20 دن سے میری بہنوں، بھتیجوں، بھائیوں اور 30 سال پہلے فوت ہونے والی میری والدہ کے گھروں پر پولیس مسلسل چھاپے مار رہی ہے، والدہ کے گھر کو بھی توڑ پھوڑ دیا ہے، ملک میں نہیں تھا اس کے باوجود 9 مئی کے واقعات کی شدید مذمت کی کیوںکہ پاک فوج کو عظیم اور ملک کا محافظ سمجھتا ہوں۔

اپنی بات کو جاری رکھتے ہوئے انہوں نے کہا کہ میں بزدل نہیں ہوں، دوستی و دشمنی قبر کی دیوار تک نبھاؤں گا، تین آدمیوں کو مجھے ختم کرنے کے لیے انگیج کیا گیا ہے، بتانا چاہتا ہوں دفاع کا حق رکھتا ہوں، حقیقی حکومت کے ذمہ داران کو لکھ دیا ہے، زیادتی کی حد ہوتی ہے، پی ڈی ایم انتقام کو اس سطح پر لے جارہی ہے کہ جو فصل وہ بو رہے ہیں وہ خود انہیں بھی کاٹنی ہے۔

شیخ رشید احمد کا کہنا تھا کہ 20 دن سے صرف ٹویٹ کر رہا ہوں، ٹی وی ٹاک شو میں بھی نہیں گیا، ٹویٹر سے اگر خوف زدہ ہیں تو جب تک گرفتار نہیں ہوتا ٹویٹ جاری رہیں گے، قوم کو بتانا چاہتا ہوں جو لوگ پارٹی چھوڑ کر جارہے ہیں وہ کمزور ہوسکتے ان کے کیسز ہوسکتے ہیں وہ دباؤ برداشت نہیں کرسکتے ہوں گے۔

انہوں نے مزید کہا کہ جب تک عمران خان یہ لڑائی لڑرہا ہے اس کے ساتھ کھڑا ہوں اور جب عمران خان اقتدار میں ہوگا اس وقت مجھ پر کوئی ذمہ داری نہیں ہوگی کہ میرا کردار کیا ہوگا، میں سچ کا حق کا جھنڈا بلند رکھوں گا بے شک میری جان ہی کیوں نہ چلی جائے۔