پاکستان کپ ویمنز کرکٹ ٹورنامنٹ آج سے کراچی میں کھیلا جائے گا

ترجمان پاکستان کرکٹ بورڈ کے مطابق پاکستان کپ ویمنز کرکٹ ٹورنامنٹ 19مئی سے کراچی میں کھیلا جائے گا۔ پاکستان کی بہترین خواتین کرکٹرز پاکستان کپ ویمنز کرکٹ ٹورنامنٹ میں ایکشن میں نظر آئیں گی۔

ترجمان کے مطابق یہ ٹورنامنٹ کا مقصد کھلاڑیوں کو محدود اوورز کی کرکٹ کے بہترین مواقع فراہم کرنا ہے ۔ ترجمان نے کہاکہ اس ٹورنا منٹ سے کھلاڑیوں کو ایمرجنگ ویمنز ایشیا کپ کی تیاری میں بھرپور مدد ملے گی جو آئندہ ماہ ہانگ کانگ میں منعقد ہوگا۔

انہوں نے کہاکہ پاکستان کپ تیرہ میچوں پر مشتمل ہوگا جو دو مرحلوں میں کھیلا جائے گا اور چار ٹیمیں رائونڈ رابن لیگ کی بنیاد پر ٹی ٹوئنٹی کھیلیں گی جبکہ تین ٹیمیں ون ڈے میچوں میں مدمقابل ہونگی ،یہ میچز ڈبل رائونڈ رابن لیگ کے تحت کھیلے جائیں گے جس کا فائنل چار جون کو ہوگا۔

ترجمان نے کہاکہ ٹورنامنٹ کے پہلے مرحلے میں اے سی سی ویمنز ایمرجنگ ایشیا کپ کی ممکنہ کھلاڑی میدان میں نظر آئیں گی جس سے انہیں اپنا ٹیلنٹ دکھانے اور صورتحال کے مطابق اپنی مہارت دکھانے کا موقع مل سکے گا،ٹورنامنٹ میں شریک اسٹرائیکرز ٹیم کی قیادت فاطمہ ثنا کریں گی جبکہ بلاسٹرز کی کپتان منیبہ علی ہونگی جو ٹی ٹونٹی انٹرنیشنل میں سنچری بنانے والی واحد پاکستانی کھلاڑی بھی ہیں۔

ترجمان نے مزید کہاکہ چیلنجرز کی ٹیم کی قیادت لیفٹ آرم اسپنر سعدیہ اقبال کریں گی جبکہ ڈائنامائٹس کی ٹیم سدرہ امین کی کپتانی میں میدان میں اترے گی،ان چار ٹیموں کے درمیان چھ ٹی ٹونٹی میچز 19 سے 21 مئی تک حنیف محمد ہائی پرفارمنس سینٹر اوول گرائونڈ اور اسٹیٹ بینک گرائونڈ میں کھیلے جائیں گے۔

ترجمان نے کہاکہ23مئی سے بلاسٹرز، چیلنجرز اور ڈائنامائٹس کی ٹیمیں پچاس اوورز پر مشتمل ون ڈے ٹورنامنٹ میں مدمقابل آئیں گی،اس ٹورنامنٹ کا فائنل اسٹیٹ بینک گرائونڈ میں کھیلا جائے گاجسے پی سی بی کے یوٹیوب چینل پر لائیو دکھایا جائے گا۔

ترجمان نے کہاکہ پاکستان کرکٹ بورڈ نے ٹورنامنٹ کے لیے نقد انعامات کا اعلان بھی کیا ہے،فاتح ٹیم کو دس لاکھ روپے اور رنراپ کو پانچ لاکھ روپے دیے جائیں گے جبکہ پلیئر آف دی میچ کے لیے بیس ہزار روپے اور پلیئر آف دی ٹورنامنٹ کے لیے پچاس ہزار روپے کا انعام رکھا گیا ہے۔

پاکستان کرکٹ بورڈ کی ویمنز کرکٹ کی سربراہ تانیہ ملک کا کہنا ہے کہ ٹورنامنٹ کا بنیادی مقصد ہماری باصلاحیت خواتین کرکٹرز کو اپنی مہارت دکھانے کا موقع فراہم کرنا ہے ، اس ٹورنامنٹ کو دو مرحلوں میں رکھا گیا ہے تاکہ دو مختلف فارمیٹس کے مختلف چیلنجز سے ان کھلاڑیوں کو تجربہ حاصل ہوسکے۔

تانیہ ملک نے کہا کہ ٹی ٹونٹی فارمیٹ سے ہماری ایمرجنگ ٹیم کو اے سی سی ویمنز ایمرجنگ ٹی ٹوئنٹی ٹورنامنٹ کی تیاری میں مدد ملے گی۔