حافظ قرآن ایماندار آرمی چیف سے عمران نیازی خوفزدہ ہے، وزیراعظم شہباز شریف

وزیراعظم شہباز شریف نے کہا ہے کہ شمشیر اعزاز اور حافظ قرآن ایماندار آرمی چیف سے عمران نیازی خوفزدہ ہے۔

اپنے ایک بیان میں وزیراعظم نے کہا کہ ہر دلعزیز اور میرٹ پر آرمی چیف بننے والے جنرل سید عاصم منیر کے خلاف عمران خان کی ہرزہ سرائی بدنیتی کے سوا کچھ نہیں۔ پی ٹی آئی کا چیئر مین کا بیان پاک فوج کے خلاف گھٹیا ذہنیت کا ایک اور ثبوت ہے، یہ بیان 9 مئی کے المناک واقعات کے ماسٹر مائنڈ کا اعتراف جرم ہے۔

اپنی بات کو جاری رکھتے ہوئے انہوں نے کہا کہ یہ وہی ذہنیت ہے جس نے محب وطن آرمی افسران پر قتل کے جھوٹے الزامات لگائے، امریکی سائفر اور بیرونی سازش کی جھوٹی کہانیاں گھڑیں، یہ ملک دشمنی اور دہشت گردوں کے ماسٹر مائنڈ کے اصل عزائم کا اظہار ہے، یہ بیان اعتراف ہے کہ 9 مئی کو جو کچھ ہوا وہ عمران نیازی کے کہنے پر ہوا۔

شہباز شریف نے کہا کہ یہ بیان ثبوت ہے کہ شہدا اور غازیوں کی یادگاروں کی بے حرمتی اور حساس تنصیبات اور عمارتوں پر حملے کے پیچھے منصوبہ بندی عمران خان کی تھی، جنرل سید عاصم منیر سے تکلیف یہ ہے کہ وہ بطور ڈی جی آئی ایس آئی عمران نیازی، ان کی اہلیہ، فرح گوگی اور پی ٹی آئی کی سینئر قیادت کی بدترین کرپشن سے آگاہ ہیں۔

شہباز شریف کا مزید کہنا تھا کہ دہشت گردی کے خلاف جنگ لڑنے والی بہادر فوج کے سپہ سالار کے خلاف اس نوعیت کی گھٹیا گفتگو دہشت گردوں کی حمایت ہے، پوری قوم مسلح افواج اور آرمی چیف کے ساتھ کھڑی ہے۔