عمران خان اور بشریٰ بی بی کے نکاح کیخلاف درخواست ناقابل سماعت قرار

اسلام آباد کی مقامی عدالت نے عمران خان اور بشریٰ بی بی کے نکاح کیخلاف دائر درخواست ناقابل سماعت قرار دے دی۔ سول جج نصر من اللہ نے دلائل مکمل ہونے پر فیصلہ محفوظ کیا تھا۔

سابق وزیراعظم عمران خان اور بشریٰ بی بی کے نکاح کیخلاف اسلام آباد کی مقامی عدالت میں دائر درخواست ناقابل سماعت قرار دے دی گئی۔ درخواست گزار وکیل رضوان عباسی کی جانب سے دلائل مکمل ہونے کے بعد سیشن عدالت نے فیصلہ محفوظ کیا تھا۔

سول جج نصر من اللہ نے کیس کا فیصلہ سناتے ہوئے مؤقف اختیار کیا کہ عدت میں نکاح کے کیس کی درخواست عدالت کے دائرہ اختیار سے باہر ہے۔

اس سے قبل آج ہونیوالی کارروائی کے دوران دلائل دیتے ہوئے رضوان عباسی نے عمران خان اور بشریٰ بی بی کے نکاح کو غیر شرعی قرار دیتے ہوئے کہا کہ اگر شادی قانونی تھی تو دوبارہ ںکاح کیوں کیا۔ جج نے استفسار کیا کہ عمران خان کا نکاح لاہور میں ہوا، اس عدالت کا دائرہ اختیار کیسے بنتا ہے؟۔

درخواست گزار وکیل نے کہا کہ بنی گالہ سے فراڈ شروع ہوا اور نکاح لاہور میں ہوا، عمران خان اور بشریٰ بی بی اسلام آباد کی حدود میں رہتے رہے، نکاح خواں کو بھی اسلام آباد سے نکاح کیلئے لے جایا گیا۔

وکیل نے عدالت کو بتایا کہ عمران خان اور بشریٰ بی بی کا فروری 2018ء میں دوبارہ نکاح اسلام آباد میں پڑھایا گیا۔

سابق وزیراعظم عمران خان نے ریحام خان سے شادی ختم ہونے کے بعد بشریٰ بی بی سے نکاح کیا تھا۔