عمران خان کو پی ٹی آئی چیئرمین شپ سے ہٹانے کی درخواستیں لاہور ہائیکورٹ بھجوادی گئیں

مقامی عدالت کے جج نے عمران خان کو تحریک انصاف کی چیئرمین شپ سے ہٹانے کیلئے درخواستیں چیف جسٹس کو بھجوادیں۔ عدالت کا کہنا ہے کہ درخواستوں کو سماعت کیلئے 5 رکنی فل بینچ کے روبرو پیش کیا جائے۔

پاکستان تحریک انصاف کے چیئرمین عمران خان کو القادر ٹرسٹ کرپشن کیس میں گرفتار کرلیا گیا ہے، عدالت نے ان کا 8 روزہ جسمانی ریمانڈ منظور کرلیا، جس کے بعد نیب نے ان سے تفتیش کا باضابطہ آغاز کردیا ہے۔

مقامی عدالت کے جج جسٹس رضا قریشی نے عمران خان کو پارٹی چیئرمین شپ سے ہٹانے سے متعلق ایک ہی نوعیت کی دو درخواستوں پر سماعت پر اپنا حکم جاری کردیا۔

جسٹس رضا قریشی نے عمران خان کو پاکستان تحریک انصاف کی چیئرمین شپ سے ہٹانے کیلئے درخواستیں چیف جسٹس لاہور ہائیکورٹ کو بھجوا دیں۔ جس میں کہا گیا ہے کہ درخواستوں کو سماعت کیلئے 5 فل بینچ کے روبرو پیش کیا جائے۔

انہوں نے کہا کہ لاہور ہائیکورٹ کا 5 رکنی فل بینچ اس حوالے سے دیگر درخواستوں پر سماعت کر رہا ہے، مناسب ہے ان درخواستوں کو بھی اُسی بینچ میں کارروائی کیلئے پیش کیا جائے۔

لاہور کے شہری جنید اور وکیل آفاق احمد نے پی ٹی آئی چیئرمین کیخلاف درخواستیں دائر کی ہیں، جس میں استدعا کی گئی ہے کہ عمران خان کی توشہ خانہ میں نااہلی کے بعد انہیں پارٹی کی صدارت سے ہٹایا جائے، نواز شریف کو بھی نااہلی کے بعد پارٹی صدرات سے ہٹایا گیا تھا۔