پی ٹی آئی رہنماؤں و کارکنوں کی گرفتاری کا ٹاسک سی ٹی ڈی اور اسپیشل برانچ کے سپرد

چیئرمین پی ٹی آئی کی گرفتاری کے بعد پرتشدد کارروائیوں پر سینیئر قیادت کی گرفتاری کیلئے موبائل ٹریکنگ یونٹ کو متحرک کردیا گیا، جناح ہاؤس سمیت شہر میں توڑ پھوڑ اور آگ لگانے والے عناصر کی گرفتاری کا ٹاسک سی ٹی ڈی اور اسپیشل برانچ کو سونپ دیا گیا جبکہ صوبہ بھر سے اب تک رہنماؤں سمیت 300 سے زائد پی ٹی آئی کارکنوں کو حراست میں لیا جاچکا ہے۔

چیئرمین پاکستان تحریک انصاف عمران خان کی گرفتاری کے بعد شروع ہونیوالے پرتشدد مظاہروں پر پی ٹی آئی رہنماؤں و کارکنوں کی گرفتاری کا ٹاسک سی ٹی ڈی اور اسپیشل برانچ کو سونپ دیا گیا جبکہ موبائل ٹریکنگ یونٹ کو بھی متحرک کردیا گیا۔

پولیس کا کہنا ہے کہ سینئر قیادت کی گرفتاری کیلئے موبائل ٹریکنگ یونٹ کو متحرک کردیا گیا، سی ٹی ڈی اوراسپیشل برانچ کو آگ لگانے اور توڑپھوڑ کرنیوالوں کی گرفتاری کا ٹاسک دیا گیا ہے۔

پولیس کے مطابق کلوز سرکٹ فوٹیجز، گاڑیوں کی نمبر پلیٹس کی شناخت کا عمل شروع کردیا گیا، سی ٹی ڈی اور اسپیشل برانچ نامزد ملزمان کے علاؤہ شرپسندوں کو گرفتار کرے گی۔

پنجاب پولیس کا کہنا ہے کہ 300 گاڑیوں کو نمبر پلیٹس کی مدد سے ٹریس کیا گیا، گاڑی مالکان کی گرفتاری کیلئے آپریشن و انویسٹی گیشن ونگ سے معلومات شئیر کی گئیں۔

دوسری جانب سیکیورٹی اداروں نے 9 مئی کو قومی املاک جناح ہاؤس حملہ کیس سمیت اہم مقامات سے 322 افراد کو گرفتار کر لیا، جناح ہاؤس بلوائیوں میں سے اہم سیاسی رہنماؤں سمیت 80 افراد کو شناخت کرکے گرفتار کر کیا گیا۔

رپورٹ کے مطابق لاہور کے مختلف مقامات پر حملے دھاوا بولنے والے 129 افراد گرفتار کرلئے گئے، شیخوپورہ سے 56 اور قصور سے 17 افراد کو گرفتار کیا جبکہ ننکانہ صاحب سے 40 شر پسند گرفتار کئے گئے۔

رپورٹ میں بتایا گیا ہے کہ پاکستان تحریک انصاف کے سوشل میڈیا اراکین کو شر انگیزی پر بھی گرفتار کیا گیا۔

واضح رہے کہ پاکستان تحریک انصاف کے مزید رہنماؤں و کارکنوں کی گرفتاریوں کیلئے بھی اقدامات کئے جارہے ہیں۔