عمران خان ، ثاقب نثار اور اسد عمر کیخلاف ریفرنس دائر

انتخابات میں ٹکٹ کی فروخت کے حوالے سے آڈیو سامنے آنے کے بعد پاکستان تحریک انصاف (پی ٹی آئی) کے چیئرمین اور سابق وزیراعظم عمران خان ، سابق چیف جسٹس آف پاکستان جسٹس ثاقب نثار اور پی ٹی آئی کے سینئر رہنما اسد عمر کیخلاف الیکشن کمیشن میں ریفرنس دائر کردیا گیا۔

ریفرنس مسلم لیگ ن کے رہنماؤں ملک احمد خان اور عطااللہ تارڑ نے دائر کیا، ریفرنس الیکشن ایکٹ 2017 اور آئین کے آرٹیکل 218 تین کے تحت دائر کیا گیا۔

پی ٹی آئی ٹکٹ ہولڈرزکی فہرست سمیت دیگر دستاویزات ریفرنس کے ہمراہ پیش کی گئیں، عمران خان، ثاقب نثار، نجم ثاقب، ابو زر، میاں عزیر، اعجاز چودھری، اسد عمر کو فریق بنایا گیا۔

ریفرنس میں استدعا کی گئی ہے کہ کرپشن، کرپٹ پریکٹسیز، ٹکٹ کے بدلے رشوت کے الزامات پر قانونی کارروائی کی جائے، مالی اور اخلاقی دونوں قسم کی کھلی کرپشن پر یہ شکایت دائر کر رہے ہیں، پنجاب اسمبلی کے پارٹی انتخابی ٹکٹوں کی خرید و فروخت جاری ہے،ایک سیاسی جماعت نے قانون، اخلاقیات اور جمہوریت کی دھجیاں اُڑا کر رکھ دیں۔

یہ بھی پڑھیں، نجم ثاقب کی آڈیو لیک کی تحقیقات کے حوالے سے بڑی پیشرفت

ریفرنس میں استدعا کی گئی ہے کہ ایک جماعت ٹکٹوں میں کرپشن کر کے سیاست کے مقدس شعبے کو گندا کر رہی ہے، آئین، قانون اور الیکشن ایکٹ کی خلاف ورزی پر الیکشن کمیشن کارروائی کرے، 29اپریل کو میڈیا میں سامنے آنے والی مبینہ آڈیو سے مذکورہ افراد بے نقاب ہوئے ہیں، آڈیوز سے پتہ چلا ہے مذکورہ افراد براہ راست جرم میں ملوث ہیں۔

ریفرنس کے متن میں مزید کہا گیا ہے کہ عمران خان نے گزشتہ ہفتے خود پارٹی ٹکٹ دئیے ہیں، آڈیولیک میں اعتراف کیاگیا ہے ثاقب نثار ڈیل میں ملوث ہیں، ثاقب نثار، اعجاز چودھری اور اسد عمر نے سہولت کاری کی، الیکشن کو جانوروں کی خریداری بنا دیا گیا ہے۔ الیکشن کمیشن معاملے کی تحقیقات کرائے اور ملزمان کو سزا دے۔

ریفرنس میں مزید کہا گیا ہے کہ عمران خان کو پارٹی چیئرمین کے عہدے سے معطل کیا جائے، پی ٹی آئی کی طرف سے جنرل الیکشن کیلئے جاری ٹکٹ معطل کئےجائیں۔