سلیم ملک نے بابر اعظم کی بطور کپتان حمایت کر دی

پاکستانی کرکٹ ٹیم کے سابق کپتان سلیم ملک نے بابر اعظم کی بطور کپتان حمایت کر دی۔

میڈیا سے گفتگو کے دوران انہوں نے کہا کہ بابر اعظم ابھی نوجوان ہیں، کپتانی ایسی چیز ہے جو ایک دن میں نہیں آتی، وقت لگتا ہے، بابر اعظم پاکستان کا بڑا نام ہے انہیں پورا موقع دینا چاہیئے، اگر پاکستان کی اچھی ٹیم بنانی ہے تو اسے موقع دینا ہوگا، اگر کہیں غلطیاں ہوتی ہیں تو تنقید کے بجائے اس کی اصلاح کی جائے۔

سابق کپتان کا کہنا تھا کہ اس میں کوئی شک نہیں کہ پنڈی کی بیٹنگ وکٹ تھی، مگر پاکستان اچھا کھیلا، فخرزمان نے بہت اچھی اننگز کھیلی، ہمیشہ کہتا ہوں فخر زمان کو ریگولر بنیادوں پر پلیئنگ الیون کا حصہ ہونا چاہیئے، ورلڈکپ سے پہلے قومی ٹیم اچھی کرکٹ کھیل رہی ہے، اللہ کرے کہ ہم ورلڈکپ جیت جائیں۔ نیوزی لینڈ کے خلاف کراچی کے میچز مشکل میچ ہوں گے، کراچی کی پچ پر بڑا اسکور نہیں ہو گا،وہاں پر اسپنرز کا بڑا رول ہوگا، جس ٹیم کی اسپن باؤلنگ اچھی ہوگی انہیں ایڈوانٹیج ہو گا۔ڈیپارٹمنٹ کرکٹ کی بحالی خوش آئند ہے ، کھلاڑیوں کو روزگار ملے گا۔