پی ٹی آئی اراکین اسمبلی کو قومی اسمبلی اجلاس میں شرکت سے روک دیا گیا
Photo Grab
تحریک انصاف کے کراچی سے مستعفی ارکان قومی اسمبلی اجلاس میں شرکت کے لیے پارلیمنٹ ہاوس پہنچ گئے، پولیس نے داخلی گیٹ پر روک دیا۔
تحریک انصاف کے کراچی سے مستعفی ارکان قومی اسمبلی سپیکر کے منع کرنے کے باوجود اجلاس میں شرکت کے لیے پارلیمنٹ ہاؤس پہنچ گئے۔ پولیس نے وی آئی پی گیٹ پر روکا تو احتجاج شروع کردیا۔ پولیس کے ساتھ ہاتھا پائی بھی ہوئی۔
مستعفی ارکان کا کہنا تھا کہ انہیں اسمبلی اجلاس میں شرکت سے روکنا قانون شکنی ہے۔۔ 7 اپریل سے سندھ ہائیکورٹ کا حکم دکھا رہے ہیں۔ کہیں شنوائی نہیں ہوئی۔ مزید روکا گیا تو توہین عدالت ہوگی۔
عالمگیر خان نے کہا کہ سندھ ہائیکورٹ سے کوئی بڑی طاقت آگئی ہے یہاں جو عدالت کا حکم نہیں مانتی۔ ہم کراچی سے منتخب لوگ ہیں۔ ہمیں اندر نہیں جانے دیا جا رہا یہ سندھ کے ساتھ ظلم ہے۔
پی ٹی آئی ارکان نے پارلیمنٹ ہاوس کے مرکزی گیٹ کے باہر علامتی دھرنا دے کر بھی اپنا احتجاج ریکارٍڈ کرایا
آفتاب صدیقی نے کہا کہ آج ہمارا حق تھا کہ ہم لوگ اجلاس میں بیٹھتے۔ اور آپ دیکھیے کہ کس طرح کا رویہ ہے۔ الیکٹیڈ لوگوں کو روکا جا رہا ہے۔ یہ جو شہباز شریف کا مارشل لا ہے ہم اس کی مذمت کرتے ہیں۔
تحریک انصاف کے ارکان پوری کوشش کے باجود اسمبلی ہال تو درکنار، پارلیمنٹ کے احاطہ میں بھی داخل نہ ہوسکے، واپس جاتے ہوئے اعلان کردیا کہ وہ ہر روز اسمبلی آئیں گے۔
ترجمان قومی اسمبلی کا کہنا ہے کہ مستعفی ہونے والے ارکان اب ایم این ایز نہیں رہے۔ انہیں ایوان میں داخلے کی اجازت نہیں دی جاسکتی۔ سندھ ہائیکورٹ نے پی ٹی آئی ارکان کے استعفوں سے متعلق الیکشن کمیشن کا نوٹیفکیشن معطل کیا ہے۔اسپیکر قومی اسمبلی کا فیصلہ نہیں۔
