سوڈان سے پاکستانیوں کی بحفاظت وطن واپسی کا پلان کامیاب

جنگ زدہ سوڈان سے پاکستانیوں کی بحفاظت وطن واپسی کا پلان کامیاب ہو گیا، وزیراعظم نے 72 گھنٹے سے جاری خصوصی ہنگامی پلان کی نگرانی خود کی۔

427 پاکستانی بحفاظت پورٹ سوڈان پہنچ گئے جہاں سے انھیں پاکستان لایا جائے گا۔ حکومت پاکستان نے تمام 427 شہریوں کی رہائش اور خوراک کا انتظام بھی کیا۔

جنگ زدہ سوڈان سے خصوصی طیاروں کے ذریعے پاکستانیوں کی واپسی ہوگی، پاکستانیوں کی وطن واپسی کے لئے دوست ممالک اور پاکستانی سفارت خانے مدد کر رہے ہیں۔

وزیراعظم شہباز شریف نے وزیر خارجہ بلاول بھٹو، وزیرمملکت حنا ربانی کھر اور وزارت خارجہ کے حکام کو شاباش دی۔

وزیراعظم نے عسکری حکام اور متعلقہ ذمہ داران کی شاندار مہارت کی تعریف بھی کی۔

اس دوران وزیراعظم نے ایئرچیف مارشل ظہیر بابر سدھو اور ڈی جی آئی ایس آئی لیفٹیننٹ جنرل ندیم انجم کو خراج تحسین پیش کیا۔

حکومت پاکستان نے پاکستانیوں کی بحفاظت انخلاء کے لئے محفوظ راستوں کا تعین کیا، پاکستانیوں کو چھوٹے چھوٹے گروہوں میں خرطوم سے محفوظ مقامات پر پہنچایا جا رہا ہے۔

سعودی عرب، ترکیہ اور مصر نے پاکستانیوں کے انخلاء میں خصوصی معاونت کی، شہباز شریف نے سعودی عرب، ترکیہ اور مصر کی قیادت کا بھی شکریہ ادا کیا۔