پنجاب کے یونیورسل ہیلتھ انشورنس پروگرام کے پیکجز میں تبدیلی کردی گئی

یونیورسل ہیلتھ انشورنس پروگرام کے پیکجز میں تبدیلی،ریٹس میں ردوبدل سمیت مختلف سروسز شامل کرنے اور نکالنے کے لیے نگراں پنجاب حکومت نے کمیٹی کا نیا چیئرمین اور کو چیئرمین تعینات کردیا۔

تفصیلات کے مطابق یونیورسل ہیلتھ انشورنس پروگرام کے تحت پیکجز میں تبدیلی ، مختلف ہیلتھ سروسز کو شامل کرنے اور نکالنے کے فیصلوں کے لیے کمیٹی کا نیا چیئرمین و وائس چیئرمین تعینات کر دیا گیا ہے۔

دستاویزات کے مطابق پنجاب کابینہ نے وزیرصحت پروفیسر ڈاکٹرجاوید اکرم کو کمیٹی کا بطور چیئرمین جبکہ وزیر توانائی ایس ایم تنویر کو بطور شریک چیئرمین مقررکردیا ہے۔ پنجاب میں ہیلتھ انشورنس پروگرام کے تحت ستاسی ہزار سے زائد بستروں پر مشتمل آٹھ سوتینتالیس اسپتال سروسز کی فراہمی کر رہے ہیں۔

دستاویزات کے مطابق پنجاب میں ہیلتھ انشورنش پروگرام سے اب تک اڑتیس لاکھ چھیالیس ہزار افراد مستفید ہو چکے ہیں۔ستاسی ارب سے زائد رقم پروگرام کے تحت علاج معالجے پرخرچ کی جا چکی ہے۔