پارلیمان ایسے قوانین تشکیل دے جو آئین پر پورے اتریں، چیف جسٹس
چیف جسٹس آف پاکستان جسٹس عمر عطاء بندیال نے کہا ہے کہ پارلیمان ایسے اچھے قوانین تشکیل دے جو آئین پاکستان کے اعلیٰ معیار پر پورے اتریں، میں خواہش کا اظہار کرتا ہوں قوانین آئین کے مطابق قوم کی ترقی، خوشحالی اور امن میں رہنمائی کریں۔
مصروفیات کی وجہ سے آئین پاکستان کی گولڈن جوبلی تقریب میں شرکت نہ کر سکنے پر چیف جسٹس نے سپیکر قومی اسمبلی راجہ پرویز اشرف کو خط لکھا دیا۔
سپیکر قومی اسمبلی کو لکھ خط میں چیف جسٹس نے لکھا کہ میں پارلیمنٹ کی تقریب میں عدالتی مصروفیات کی وجہ سے حاضر نہیں ہو سکا، آئین پارلیمنٹ کو ریاست میں قوانین وضع کرنے کا اختیار اور اہم ذمہ داری تفویض کرتا ہے۔
خط میں انہوں نے مزید لکھا کہ آئین پاکستان کے تحت ہمارے قوانین ہمارے سیاسی، سماجی اور معاشی اہداف کو پورا کرنے کے حوالے سے ہماری قسمت کا فیصلہ کرتے ہیں۔
سپیکر قومی اسمبلی کو خط میں جسٹس عمر عطا بندیال نے مزید لکھا کہ میں نیک خواہشات کا اظہار کرتا ہوں کہ پارلیمان ایسے اچھے قوانین تشکیل دے جو آئین پاکستان کے اعلیٰ معیار پر پورے اتریں اور میں اس خواہش کا بھی اظہار کرتا ہوں کہ یہ قوانین آئین کے مطابق قوم کی ترقی، خوشحالی اور امن میں رہنمائی بھی کریں۔
