مخالفین کچھ بھی کر لیں میئر کراچی پی پی کا ہی ہو گا، بلاول بھٹو
پاکستان پیپلز پارٹی کے چیئر مین اور سابق وفاقی وزیر خارجہ بلاول بھٹو زرداری نے کہا ہے کہ مخالفین کچھ بھی کر لیں، کراچی کا میئر پیپلز پارٹی کا ہو گا۔
کراچی میں دنیا کے سب سے بڑے امراض قلب کے ذوالفقار علی بھٹو انسٹیٹیوٹ آف کارڈیو ویسکولر ڈیزیز ہسپتال کی سنگ بنیاد تقریب سے خطاب کرتے ہوئے وفاقی وزیر خارجہ کا کہنا تھا کہ الیکشن کمیشن کی جانب سے ضمنی الیکشن کا شیڈول دینا مذاق ہے۔ بلدیاتی الیکشن کے دوران تاریخ میں پہلی مرتبہ حیدرآباد میں کلین سوئپ کیا، کراچی میں سب سے بڑی جماعت بن کر ابھرے،ہم نے محنت کے بعد بڑا الیکشن جیتا ہے۔
اپنی بات کو جاری رکھتے ہوئے انہوں نے کہا کہ کراچی اور حیدرآباد میں جیالا میئر ہوگا تو کیا قیامت ٹوٹ پڑے گی؟ مخالفین کو ہضم نہیں ہو رہا کہ کراچی کا میئر پیپلزپارٹی کا ہوگا۔ حیران ہوں سندھ میں بلدیاتی الیکشن ہو چکے مگر عوام نمائندوں سے محروم ہیں۔
انہوں نے کہا کہ پیپلزپارٹی کبھی تھنڈر اسکواڈ کا مقابلہ کرتی تھی اور کبھی باہر بیٹھے دہشت گردوں کا مقابلہ کرتی تھی۔ ہم انسانیت کی بنیاد پر علاج کرتے ہیں، این آئی سی وی ڈی ہر صوبے میں پوری قوم کے لیےماڈل بننا چاہیے اور آگر دوسرے صوبے چاہیں تو ندیم قمر ان کو دینے کو تیار ہیں۔ لوگ کہتے ہیں کہ اختیارات کی منتقلی اور 18ویں ترمیم سے کیا ملااسکا جواب این آئی سی وی ڈی ہے۔
انہوں نے کہا کہ صحت میں انقلاب مفت علاج ہے اور این آئی سی وی ڈی کا تسلسل رکنے والا نہیں ہے، ہم دیگر شہروں میں بھی دل کے مفت علاج کی سہولیات دیں گے۔ این آئی سی وی ڈی یورپ بھارت کے کسی اسپتال کا مقابلہ کر سکتا ہے۔ 10، 15 سال سے پیپلزپارٹی کی کردارکشی میں لگے ہوئے ہیں لیکن این آئی سی وی ڈی سب کو منہ توڑ جواب ہے۔ کچھ کہتے ہیں کہ 30 سال سے جدوجہد میں لگے ہوئے ہیں اور 30 سال کی عمر کا ہوا تو دنیا کا سب سے بڑا مفت علاج کا سینٹر بنا دیا۔
