جنوبی وزیرستان: سیکیورٹی فورسز کے آپریشن میں 8 دہشت گرد ہلاک

خیبرپختونخوا کے ضلع جنوبی وزیرستان میں سیکیورٹی فورسز کے آپریشن میں 8 دہشت گرد انجام کو پہنچ گئے۔

پاک فوج کے شعبہ تعلقات عامہ آئی ایس پی آر کے مطابق جنوبی وزیرستان کے علاقے زنگارہ میں دہشتگردوں کیخلاف دوران آپریشن سیکیورٹی فورسز اور دہشتگردوں کے درمیان شدید فائرنگ اور مارٹرگولوں کا تبادلہ ہوا۔

ترجمان پاک فوج کے مطابق فائرنگ کے تبادلے میں 8 دہشتگردہلاک ہوگئے جبکہ 2 بچے بھی شہید اور 2فوجی جوان زخمی ہوگئے۔

یاد رہے کہ اس سے قبل 8 مارچ کو شمالی وزیرستان میں بھی سیکیورٹی فورسز سے جھڑپ کے دوران 6 دہشت گرد ہلاک ہوگئے تھے۔

سیکیورٹی فورسز نے دہشت گردوں کی موجودگی کی اطلاع پر شمالی وزیرستان کی تحصیل دتہ خیل کے علاقے محمد خیل میں آپریشن کیا۔ آپریشن کے دوران ریاست کو مطلوب 6 اہم دہشت گرد ہلاک کردیے گئے۔ دہشت گردوں کے قبضے سے گولہ بارود اور جدید اسلحہ بھی برآمد ہوا ہے۔