انتخابی ریلیوں پر پابندی کا معاملہ، الیکشن کمیشن کا اہم اجلاس طلب

پنجاب حکومت کی جانب سے انتخابی ریلیوں پر پابندی کے معاملے پر غور کیلئے الیکشن کمیشن آف پاکستان اہم اجلاس کل بروز پیر 13 مارچ کو اسلام آباد میں طلب کرلیا ہے۔

ترجمان ای سی پی کے مطابق کل ہونے والے اجلاس میں پاکستان تحریک انصاف ( پی ٹی آئی ) کی درخواستوں پر غور کیا جائے گا۔

پی ٹی آئی نے لاہور میں دفعہ 144 کے خلاف پٹیشن دائر کردی

چیف الیکشن کمشنر سکندر سلطان راجہ اجلاس کی صدارت کریں گے۔ الیکشن کمیشن کا اہم اجلاس صبح ساڑھے 10 بجے شروع ہوگا۔

قبل ازیں سابق وزیر اعظم اور چیئرمین پی ٹی آئی عمران خان کی ہدایت پر پارٹی رہنما بابر اعوان نے لاہور میں دفعہ 144 کے نفاذ کو چیلنج کرنے کی درخواست الیکشن کمیشن میں دائر کردی۔

پی ٹی آئی ریلی کا معاملہ،لاہور میں رینجرز طلب

درخواست میں کہا گیا کہ ’الیکشن کمیشن دفعہ 144 کے نفاذ کو ختم کرے، لاہور میں تحریک انصاف کی ریلی پر دفعہ 144 کا نفاذ غیر قانونی ہے، حکومت پنجاب دفعہ 144 کا نفاذ کر کے سپریم کورٹ کے فیصلے کی خلاف ورزی کر رہی ہے۔‘

درخواست کے مطابق ’حکومت پنجاب پی ایس ایل میچ کو جواز بنا کر ریلی کو روکنے کی کوشش کر رہی ہے، تحریک انصاف کی ریلی اور پی ایس ایل کے میچ کا روٹ مختلف ہے‘۔

لاہور میں دفعہ 144نافذ

پی ٹی آئی کی جانب سے دائر درخواست میں مزید کہا گیا کہ تحریک انصاف کی ریلی ساڑھے 5 بجے ختم ہوجائے گی جبکہ پی ایس ایل کا میچ 7 بجے شروع ہوگا، اس سے پہلے کسی شہر میں پی ایس ایل کے دوران دفعہ 144 کا نفاذ نہیں کیا گیا، الیکشن مہم تحریک انصاف کا آئینی حق ہے، حکومت پنجاب غیر قانونی طور پر تحریک انصاف کی الیکشن مہم کو روک رہی ہے’۔