وزیراعظم پاکستان شہباز شریف قطر پہنچ گئے

وزیراعظم پاکستان میاں محمد شہباز شریف امیر قطر کی دعوت پر آج بروز اتوار 5 مارچ کو دوحہ پہنچ گئے ہیں۔

ترجمان دفتر خارجہ کی جانب سے جاری بیان کے مطابق امیر قطر کی دعوت پر وزیراعظم محمد شہباز شریف 5 سے 6 مارچ کو دوحہ میں قیام کریں گے ، جہاں وہ اقوام متحدہ کے زیراہتمام کم ترقی یافتہ ممالک کی پانچویں کانفرنس میں شرکت کریں گے۔

وزیراعظم کا امیر قطر کو ٹیلی فون ، سیلاب متاثرین کیلئے امدادی کانفرنس میں شرکت کی دعوت

مارچ 5 سے 9 تک منعقد ہونے والی اس کانفرنس کے دوران کم ترقی یافتہ ممالک میں پائیدار ترقی کو تیز کرنے کے اقدامات پر غور کیا جائے گا جن سے انہیں خوشحالی کی راہ پر گامزن کرنے میں مدد ملے گی۔

قطر نے پاکستان میں 3 ارب ڈالر سرمایہ کاری پر آمادگی ظاہر کردی

بیان میں کہا گیا کہ دوحہ میں کانفرنس کے موقع پر وزیراعظم شریک رہنماؤں اور وفود کے سربراہان سے دو طرفہ ملاقاتیں اور بات چیت کریں گے۔

قطر آمد پر وزیراعظم کی جانب سے مائیکرو بلاگنگ سائٹ پر پیغام بھی جاری کیا گیا۔

ٹوئٹر پر وزیراعظم نے لکھا کہ “ امیرقطر شیخ تمیم بن احمدالثانی کی دعوت پر دوحہ پہنچا ہوں، 5ویں اقوام متحدہ کم ترقی یافتہ ممالک کی کانفرنس میں شرکت کروں گا۔ وزیراعظم نے یہ بھی لکھا کہ ایشیا، افریقہ کے ممالک کو درپیش چیلنجز سے متعلق نقطہ نظر شیئر کروں گا“ ۔

واضح رہے کہ گزشتہ روز وزیراعظم شہباشریف نے قطر کے ساتھ برادرانہ تعلقات کو باہمی طور پر سود مند اقتصادی روابط میں بدلنے کا عزم ظاہر کیا تھا۔

سرکاری خبررساں ادارے ’اے پی پی‘ کی رپورٹ کے مطابق وزیراعظم محمد شہباز شریف سے قطر کے سفیر شیخ سعود بن عبدالرحمن بن فیصل الثانی نے گزشتہ روز اسلام آباد میں ملاقات کی۔

وزیراعظم آفس سے جاری بیان کے مطابق ملاقات کے دوران قطر کے سفیر نے قطر اور پاکستان کے درمیان برادرانہ تعلقات کو بڑھانے کے لیے کی جانے والی مختلف سرگرمیوں سے وزیراعظم کو آگاہ کیا۔

وزیراعظم نے 2022 میں تاریخی سیلاب کے نتیجے میں پاکستانی عوام کی انسانی ہمدردی کی بنیاد پر امداد پر قطر کا شکریہ ادا کیا تھا۔ قطری سفیر نے برادرانہ دوطرفہ تعلقات کو مزید فروغ دینے پر وزیراعظم کا شکریہ ادا کیا اور اس سلسلے میں قطر کی جانب سے تعاون کا یقین دلایا تھا۔

واضح رہے کہ قطر تقریباً ڈھائی لاکھ پاکستانیوں کی میزبانی کرتا ہے جو دونوں ممالک کی ترقی میں اہم کردار ادا کر رہے ہیں۔ رواں برس پاکستان اور قطر کے درمیان سفارتی تعلقات کے قیام کی 50 ویں سالگرہ ہے، دونوں ممالک اس سالگرہ کو بہترین انداز میں منانے کے لیے پرعزم ہیں۔