لاہور قلندرز کا ملتان سلطانز کو جیت کیلئے 181 رنز کا ہدف

پی ایس ایل 8 کے میچ میں لاہور قلندرز نے ملتان سلطانز کو جیت کیلئے 181 رنز کا ہدف دیا ہے، سام بلنگز نے نصف سنچری اسکور جبکہ عبداللہ شفیق نے بھی ذمہ دارانہ بیٹنگ کی۔

پی ایس ایل 8 کے 20 ویں میچ میں لاہور قلندرز کے کپتان شاہین شاہ آفریدی نے ملتان سلطانز کیخلاف ٹاس جیت کر بیٹنگ کا فیصلہ کیا اور مقررہ 20 اوورز میں 9 وکٹوں کے نقصان پر 180 رنز بنا ڈالے۔

لاہور قلندرز کے اسٹار اوپنر فخر زمان بغیر کوئی رن بنائے پویلین لوٹ گئے تاہم اس کے بعد عبداللہ شفیق نے ذمہ داری سے بیٹنگ کی، وہ 48 رنز بنا کر آؤٹ ہوئے، ان کی اننگز میں 6 چوکے اور ایک چھکا شامل تھا، سام بلنگز نے بھی جارحانہ انداز اختیار کیا، انہوں نے 2 چھکوں اور 6 چوکوں کی مدد سے 54 رنز بنائے۔

مرزا بیگ 17، سکندر رضا 14، حسین طلعت 9، راشد خان صفر اور شاہین شاہ آفریدی 9 رنز بنا کر آؤٹ ہوئے۔ ڈیوڈ ویزے 15 رنز بنا کر ناٹ آؤٹ رہے۔

ملتان سلطانز کی جانب سے انور علی، احسان اللہ، عباس آفریدی اور کیرن پولارڈ نے 2، 2 کھلاڑیوں کو آؤٹ کیا، ثمین گل نے ایک شکار کیا۔

ٹاس کے موقع پر گفتگو کرتے ہوئے شاہین شاہ آفریدی نے کہا کہ آج کے مچی کیلئے ٹیم میں کوئی تبدیلی نہیں کی گئی۔

ملتان سلطانز کے کپتان محمد رضوان کا کہنا ہے کہ ٹاس جیت جاتے تو پہلے بیٹنگ ہی کرتے، ٹاس کو نہیں دیکھتے، اچھی کرکٹ کھیلنے کی کوشش کریںگے۔

انہوں نے کہا کہ لاہور قلندرز کیخلاف میچ میں 2 تبدیلیاں کی گئی ہیں، لاہور قلندرز کو کم سے کم اسکور پر آؤٹ کرنے کی کوشش کریں گے۔

پاکستان سپر لیگ 8 کے پوائنٹس ٹیبل پر لاہور قلندرز کی ٹیم 10 پوائنٹس کے ساتھ ٹاپ پوزیشن پر ہے جبکہ ملتان سلطانز 8 پوائنٹس کے ساتھ دوسرے نمبر پر ہے۔