ملتان سلطانز کے خلاف کراچی کنگز کی شاندار فتح

کراچی کنگز نے ملتان سلطانز کو 66 رنز سے ہرادیا ۔

کراچی کے نیشنل بینک کرکٹ ارینا میں کھیلے گئے میچ میں ملتان سلطانز نے ٹاس جیت کر کراچی کنگز کو بیٹنگ کی دعوت دی۔

کراچی کنگز نے مقررہ 20 اوورز میں 167 رنز بنائے اور ملتان سلطانز کو جیت کے لیے 168 رنز کا ہدف دیا، جواب میں ملتان سلطانز کی پوری ٹیم 101 رنز پر ڈھیر ہوگئی۔

کنگز کی اننگز

کراچی کنگز کی جانب سے جیمز ونس اور میتھیو ویڈ میدان میں اترے۔ دونوں نے 32 رنز کا اوپننگ سراکت فراہم کی۔

انور علی نے اس جوڑی کو ونس کی وکٹ لے کر توڑا۔ جس کے بعد ویڈ کا ساتھ نبھانے طیب طاہر میدان میں اترے۔

ویڈ اور طیب نے بہترین بلے بازی کی، طیب طاہر نے نصف سینچری بناکر اپنے پہلے میچ کو یادگار بنادیا۔ انہوں نے 33 گیندوں پر اپنی نصف سینچری اسکور کی۔

طیب طاہر اور میتھیو ویڈ نے 109 رنز ک شراکت قائم کی، 141 رنز پر احسان اللہ نے طیب طاہر کو آؤٹ کیا تو ان کا اسکور 65 رنز تھا۔

میتھیو ویڈ نے طیب طاہر کے بعد شعیب ملک کے ساتھ اسکور آگے بڑھانا شروع کیا۔

148 رنز پر میتھیو ویڈ آؤٹ ہوگئے، انہوں نے 47 گیندوں پر 46 رنز بنائے۔

کراچی کنگز نے مقررہ 20 اوورز میں 3 وکٹوں کے نقصان 167 رنز بنائے اور جیت کے لیے 168 رنز کا ہدف دیا۔

ملتان سلطانز کی اننگز

شان مسعود اور محمد رضوان نے ہدف کے تعاقب شروع کیا، ملتان سلطانز کی پہلی وکٹ 41 رنز پر گری، شان مسعود کو عاکف جاوید نے آؤٹ کیا۔

کراچی کنگز کو دوسری کامیابی 57 رنز پر ریلی روسو کی صورت میں ملی، 68 رنز پر ڈیوڈ ملر بھی آؤٹ ہوگئے۔

صرف 2 رنز کے اضافے کے بعد محمد رضوان بھی پویلین لوٹ گئے، انہوں نے سب سے زیادہ 29 رنز بنائے۔

76 رنز پر ملتان سلطانز کی آدھی ٹیم میدان بدر ہوچکی تھی۔پانچویں آؤٹ ہونے والے کھلاڑی خوشدل شاہ تھے۔

88 پر اسامہ میر اور 95 پر بریتھ ویٹ پویلین لوٹ گئے۔ 97 رنز پر ملتان کا آٹھواں کھلاڑ ی آؤٹ ہوا۔ عقیل حسین صرف 2 رنز بناسکے۔ 101 رنز پر انور علی بھی آؤٹ ہوگئے، انہوں نے 12 رنز بنائے۔ ملتان سلطان کی آخری وکٹ 101 پر ہی گری۔

ملتان سلطانز کے خلاف تبریز شمسی اور شعیب ملک نے 3، جب کہ عاکف جاوید اور عماد وسیم نے 2،2 کھلاڑی آؤٹ کئے۔

کراچی کنگز پلیئنگ الیون

کراچی کنگز کی قیادت عماد وسیم کر رہے ہیں جب کہ ٹیم میں 3 تبدیلیاں کی گئی ہے۔

ملتان میں ٹیم کا حصہ بننے والے محمد عمر کی جگہ محمد موسیٰ کی ٹیم میں واپسی ہوئی. طیب طاہر نے اپنا پی ایس ایل ڈیبیو کیا، ان کو حیدر علی کی جگہ ٹیم میں شامل کیا گیا۔ عمران طاہر کی جگہ تبریز شمسی آج کراچی کنگز کے لیے اپنا ڈیبو کیا ہے۔

دیگر کھلاڑیوں میں شعیب ملک، عامر یامین، عاکف جاوید ، جیمز ونس، میتھیو ویڈ، بین کٹنگ اور محمد عرفان خان شامل ہیں۔

ملتان سلطانز پلیئنگ الیون

ملتان سلطانز کی قیادت وکٹ کیپر بیٹر محمد رضوان نے کی، جب کہ دیگر کھلاڑیوں میں شان مسعود، ریلی روسو، ڈیوڈ ملر، خوشدل شاہ، کارلوس بریتھ ویٹ، انور علی، عقیل حسین، اسامہ میر، احسان اللہ اور عباس آفریدی شامل تھے۔