کرسٹیانو رونالڈو کا تلوار کے ساتھ سعودی رقص

پرتگالی اسٹار فٹبال کرسٹیانو رونالڈو نے سعودی عرب کے یوم تاسیس پر تلوار کے ساتھ روایتی رقص کیا۔

سعودی فٹبال کلب النصر اور اسٹار فٹبالر نے اپنے ٹوئٹر اکاؤنٹس پر سعودی عرب کے یوم تاسیس پر ویڈیو شیئر کی ہے، جس میں کرسٹیانو رونالڈو سمیت کئی کھلاڑیوں کو یوم تاسیس پر جشن مناتے دکھایا گیا ہے۔

ٹوئٹر پر جاری ویڈیو میں دیکھا جاسکتا ہے کہ پرتگالی اسٹار اور پانچ بار دنیا کے بہترین کھلاڑی کا اعزاز حاصل کرنیوالے کرسٹیانو رونالڈو نے النصر کلب کے دیگر کھلاڑیوں کے ہمراہ سعودی لباس میں یوم تاسیس کا جشن منایا۔

کرسٹیانو رونالڈو نے تلواروں کے روایتی سعودی رقص ’العرضہ‘ میں بھی حصہ لیا۔ وڈیو میں پرتگالی اسٹار کو سعودی قہوہ پیتے ہوئے، عوامی گیتوں پر رقص کرتے دیکھا جاسکتا ہے۔

رونالڈو نے انسٹا گرام پر وڈیو شیئر کی جس میں انہوں نے لکھا کہ ’سعودی عرب کا یوم تاسیس مبارک‘۔ ان کا کہنا تھا کہ سعودی عرب کے یوم تاسیس کے جشن میں شرکت کا تجربہ شاندار رہا۔

سعودی عرب 22 فروری کو یوم تاسیس مناتا ہے جو دراصل 300 سال پہلے قائم ہونیوالی سعودی ریاست کی یاد دلانے والا دن ہے، جس کے باقاعدہ قیام کا اعلان امام محمد بن سعود نے 1727ء میں کیا تھا۔