الیکشن کمیشن کا صدر کے خط کا جواب؛ الفاظ کے انتخاب پر تحفظات کا اظہار

چیف الیکشن کمشنر سکندر سلطان راجا نے صدر مملکت ڈاکٹر عارف علوی کے خط کا جواب دے دیا ہے۔

صدر مملکت ڈاکٹر عارف علوی نے چیف الیکشن کمشنر کو پنجاب اور خیبر پختونخوا اسمبلیوں کے انتخابات کے لئے خط لکھا تھا۔

جس پر چیف الیکشن کمشنر سکندر سلطان راجا نے بھی صدر مملکت کو جوابی خط بھجوادیا ہے۔ جس میں چیف الیکشن کمشنر نے صدر مملکت کی جانب سے استعمال کئے الفاظ پر تحفظات کا اظہار کیا ہے۔

خط میں لکھا گیا ہے کہ صدر مملکت ریاست کے سربراہ ہیں، تمام آئینی ادارے ان کے ماتحت ہیں، ایوان صدر کی جانب سے رہنمائی کا احترام کرتے ہیں، کسی آئینی ادارے کو مخاطب کرنے کیلئے بہتر الفاظ کا انتخاب ضروری ہے،صدر مملکت کے خط میں بہتر الفاظ کا چناؤ کیا جا سکتا تھا۔

چیف الیکشن کمشنر نے کہا کہ الیکشن کمیشن آئین اور قانون کی پاسداری کرتا ہے، انتخابات کرانا کام ہے، الیکشن کی تاریخ کا اعلان کرنا صدر مملکت اور گورنرز کے اختیارات ہیں، قومی اسمبلی صدر مملکت تحلیل اور وہ ہی عام انتخابات کا اعلان کرتے ہیں۔

خط میں لکھا ہے کہ صوبائی اسمبلیوں کے الیکشن کی تاریخ دینے کا اختیار گورنرز کے پاس ہے، صوبائی اسمبلیوں کے انتخابات کے لئے لاہور ہائی کورٹ نے گورنر سے ملاقات کا حکم دیا، الیکشن کمیشن حکام نے گورنرز سے ملاقات کی،انھوں نے تاریخ دینے سے معذرت کی۔