تحریک انصاف کاتوہین مذہب کامعاملہ عالمی سطح پراٹھانےکافیصلہ
SAMAA | TV
Posted: May 1, 2022 | Last Updated: 3 hours ago 
تحریک انصاف نے توہین مذہب قوانین کے غلط استعمال اور جعلی مقدمات بنانے کا معاملہ عالمی سطح پر اٹھانے کا فیصلہ کرلیا۔
سابق وفاقی وزیرانسانی حقوق شیریں مزاری اس سلسلے میں اقوام متحدہ کے نمائندہ خصوصی کوخط لکھیں گی۔ یو این نمائندہ خصوصی انسانی حقوق کو تحقیقات کی درخواست کی جائے گی۔
اس سے قبل آج ٹویٹر پیغام میں شیریں مزاری کا کہنا تھا کہ عمران خان ہی وہ تنہا مسلم رہنما ہیں جس میں اسلاموفوبیا پر مغرب سے ٹکر لینے کی ہمت تھی۔ اقوام متحدہ سے اسلاموفوبیا کیخلاف 15 مارچ کو عالمی دن کے طور پر منوایا۔
اس سے قبل آج پریس کانفرنس سے خطاب میں چیئرمین تحریک انصاف کا کہنا تھا کہ اس سے بے وقوفانہ کیس کیا ہوسکتا ہےکہ مدینہ میں کوئی حرکت ہوتی ہے اور اگلے دن ان کی مہم چل جاتی ہے کہ یہ سب ہم نے کروایا، چیلنج کرتاہوں یہ عوام میں کہیں بھی جائيں ان کے ساتھ یہی ہوگا۔
واضح رہے کہ مسجد نبوی میں پاکستانی وفد کے خلاف نعرے بازی اور بدسلوکی پر چیئرمین پی ٹی آئی عمران خان سمیت 150 افراد کے خلاف مقدمہ درج کرلیا گیا ہے۔
پولیس کے مطابق مسجد نبوی میں پاکستانی وفد کے خلاف نعرے بازی اور بدسلوکی پر چیئرمین پی ٹی آئی عمران خان سمیت ایک سو پچاس افراد کے خلاف مقدمہ درج کرلیا گیا ہے۔
فیصل آباد کی کہکشاں کالونی تھانے ميں درج کیے گئے مقدمے میں شيخ رشيد، شہباز گل، فواد چوہدری اور قاسم سوری، راشد شفیق اور انیل مسرت کو بھی نامزد کیا گیا ہے۔ درج ایف آئی آر کے متن کے مطابق یہ دعویٰ سامنے آیا ہے کہ ڈیڑھ سو افراد کو سازش کے تحت سعودی عرب بھجوایا گیا۔ مسجد نبوی میں ہونے والا واقعہ سوچے سمجھے منصوبے کے تحت عمل میں آیا۔
تازہ ترین
مقبول خبریں
