യുവാവിനെ കുത്തിപരിക്കേൽപ്പിച്ച കേസിൽ ഒളിവിൽ കഴിഞ്ഞ പ്രതി കഞ്ചാവുമായി അറസ്റ്റിൽ

നേമം: യുവാവിനെ കുത്തിപ്പരിക്കേൽപ്പിച്ചശേഷം ഒളിവിലായിരുന്ന പ്രതി കഞ്ചാവുമായി അറസ്റ്റിൽ. വിളവൂർക്കൽ ശാന്തുംമൂല ആൽത്തറ സി.എസ്.ഐ പള്ളിക്ക് സമീപം സോഫിൻ നിവാസിൽ സോഫിൻ (29) ആണ് പിടിയിലായത്.

രണ്ടു മാസം മുമ്പ്​ പാലോട്ടുവിളയിൽ അരുൺ (21) എന്ന യുവാവിനെ കുത്തിപ്പരിക്കേൽപ്പിച്ച് ഒളിവിൽ പോകുകയായിരുന്നു ഇയാൾ. വ്യക്തിവിരോധം മൂലമാണ് ഇയാൾ യുവാവിനെ കുത്തിയത്. ​ഗുരുതരമായി പരിക്കേറ്റ അരുൺ ഇപ്പോഴും അബോധാവസ്ഥയിൽ കഴിയുകയാണ്.

Read Also : സ്കൂൾ മുറ്റത്ത് കുഴിച്ചിട്ട നിലയിൽ കണ്ടെത്തിയ അരി സപ്ലൈകോയുടേത് അല്ലെന്ന് അധികൃതർ

10 കിലോ കഞ്ചാവുമായി കഴിഞ്ഞദിവസം ആണ് ചിറയിൻകീഴ് പൊലീസ് പ്രതിയെ പിടികൂടിയത്. തുടർന്ന് മലയിൻകീഴ് പൊലീസ് ഇയാളെ കസ്റ്റഡിയിൽ വാങ്ങി തെളിവെടുപ്പ് നടത്തി. അടിപിടി, കൊലപാതകം, മോഷണം തുടങ്ങി നിരവധി കേസുകൾ ഇയാളുടെ പേരിലുണ്ടെന്ന് പൊലീസ് പറഞ്ഞു.

മലയിൻകീഴ്, മാറനല്ലൂർ, ചിറയിൻകീഴ് സ്റ്റേഷനുകളിലായി 17 കേസുകൾ ഇയാൾക്കെതിരേയുണ്ട്. മലയിൻകീഴ് സി.ഐ എ.വി സൈജു, എസ്.ഐ ആർ. രാജേഷ്, സി.പി.ഒമാരായ അഭിലാഷ്, ഷിബു, അനിൽകുമാർ എന്നിവർ ഉൾപ്പെട്ട സംഘം കസ്റ്റഡിയിൽ വാങ്ങിയ പ്രതിയെ വിശദമായ തെളിവെടുപ്പിനുശേഷം കോടതിയിൽ ഹാജരാക്കി റിമാൻഡ് ചെയ്തു.