ఆఫ్ఘనిస్తాన్‌లో తాలిబాన్ ఆక్రమణ తర్వాత తలెత్తిన పరిస్థితుల గురించి ఐక్యరాజ్య సమితి అత్యవసర సమావేశం జరుపుతున్న విషయం తెలిసిందే. ఐక్యరాజ్యసమితి భద్రతా మండలి (యూఎన్ ఎస్ సి)  సమావేశంలో సోమవారం పాల్గొన్న యునైటెడ్ నేషన్స్ (యూఎన్) సెక్రటరీ జనరల్ ఆంటోనియో గుటెరెస్ అంతర్జాతీయ సమాజానికి విజ్ఞప్తి చేశారు. ఆఫ్ఘనిస్తాన్‌ను ఉగ్రవాద సంస్థలకు సురక్షిత ప్రాంతంగా చేయడానికి వీల్లేదని, దీనికోసం అంతర్జాతీయ సమాజం ఏకం కావాలని ఆయన అన్నారు. యూఎన్ సెక్రటరీ జనరల్ ఆంటోనియో గుటెర్రెస్ మాట్లాడుతూ "ఆఫ్ఘనిస్తాన్‌లో ప్రపంచ ఉగ్రవాద ముప్పుకు వ్యతిరేకంగా ఐక్యమత్యంగా పని చేయాలని అంతర్జాతీయ సమాజాన్ని కోరుతున్నాను అని అన్నారు.

 

దేశవ్యాప్తంగా దిగ్భ్రాంతికరమైన నివేదికలు మాకు అందుతున్నాయి. చీకటి రోజులు తిరిగి వస్తాయని భయపడే ఆఫ్ఘనిస్తాన్‌లో మహిళలు, బాలికలపై పెరుగుతున్న మానవ హక్కుల ఉల్లంఘనలు ఆందోళన కలిగిస్తున్నాయి. ఆఫ్ఘనిస్తాన్‌లో మానవ హక్కులను పరిరక్షించడానికి మనం అందరం గొంతు ఎత్తాలి. అంతర్జాతీయ మానవతా చట్టాన్ని, అందరి హక్కులు, స్వేచ్ఛలను గౌరవించాలని, రక్షించాలని నేను తాలిబన్లు సహా అన్ని పార్టీలకు పిలుపునిస్తున్నాను. ప్రాణాలను కాపాడటానికి, మానవతా అవసరాలను తీర్చడానికి అన్ని పార్టీలు, ముఖ్యంగా తాలిబన్లు సంయమనం పాటించాలని నేను కోరుతున్నాను. వేలాది మంది ప్రజలు తమ ఇళ్లను వదిలి వెళ్లవలసి వచ్చింది. శరణార్థులను అంగీకరించమని నేను అన్ని దేశాలను కోరుతున్నాను" అని అన్నారు.