తాజాగా ఆయన వైసీపీ ఎంపీ విజయసాయిరెడ్డి బెయిల్ రద్దు కావాలి అంటూ మరో పిటిషన్ దాఖలు చేశారు. ఆయన విదేశాలకు పారిపోయే అవకాశం ఉందని కూడా పేర్కొన్నారు. ఇక ఆయన తన పలుకుబడితో సాక్ష్యులను బెదిరిస్తున్నారు అని కూడా చెబుతున్నారు. మరి రఘురామ ఇక్కడే అతి ఉత్సాహంతో దొరికేశారా అన్న చర్చ అయితే సాగుతోంది. జగన్ మీద పిటిషన్ పెట్టడమే ఆయన ధిక్కార ధోరణిని తెలియచేస్తూ ఉంటే ఇపుడు అదే పార్టీకి చెందిన సీనియర్ నేత విషయంలో కూడా ఆయన అలా చేయడం కంటే కచ్చితంగా ఒక  అజెండా పెట్టుకునే ఆయన పనిచేస్తున్నారు అని చెప్పకనే చెబుతున్నారు రాజకీయ విశ్లేషకులు అంటున్నారు.

ఈ ఆధారాలు చాలవా ఆయన పార్టీ వ్యతిరేక చర్యలకు పాల్పడుతున్నారు అని చెప్పడానికి అంటున్నారు. మరో వైపు రఘురామ విషయంలో లోక్ సభ  స్పీకర్ బిర్లా ఆయన్ని  వివరణ కోరారు. దాని గడువు కూడా గత నెల చివరితో ముగిసిపోయింది. ఇపుడు స్పీకర్ ఏ రకమైన యాక్షన్ తీసుకుంటారు అన్న దాని మీదనే వైసీపీ ఆసక్తిగా చూస్తోంది. స్పీకర్ కనుక చర్యలు తీసుకోకపోతే వైసీపీ ఇంకా గట్టిగా తమ నిరసన తెలియచేసే అవకాశాలు ఉంటాయని అంటున్నారు. మరి ఇంతలా రఘురామ చెలరేగిపోతున్నా కూడా స్పీకర్ ఎందుకు ఆయన మీద అనర్హత వేటు వేయరు అన్నదే వైసీపీ పెద్దలకు అర్ధం కాని విషయంగా ఉంది. మొత్తానికి రఘురామ మాత్రం యాంటీ జగన్, యాంటీ వైసీపీ అని యావత్తు జనాలకు తెలిసిపోయిందనే అంటున్నారు.