పోనీ.. కాలజ్ఞానం కాకపోయినా.. ఆయన కంటున్న కల.. ఎప్పటి నుంచో ఆంధ్రజ్యోతి రాధాకృష్ణ ఎదురు చూస్తున్న రోజు.. ఈ విషయం ఆయన గతంలోనూ తన కొత్త పలుకు వ్యాసంలో పలుసార్లు రాసుకొచ్చారు. ఇదిగో జగన్ జైలుకు వెళ్లబోతున్నాడు.. అదుగో ఇక జగన్ బెయిల్ రద్దవుతోంది అంటూ గతంలోనూ రాశారు. ఈసారి ఇంకాస్త ముందుకు వెళ్లారు. జగన్ సీఎం సీటు కోసం కుటుంబంలో కొట్లాట అన్న విషయం ఎప్పుడో రాసేశారు.

ఇక ఇప్పుడు జగన్ సీఎం సీటు కోసం కుటుంబ సభ్యులు కొట్టుకుంటే.. కేంద్రంలోని బీజేపీ ఎవరికి మద్దతు ఇస్తుంది అనే దాకా వెళ్లిపోయింది ఆర్కే ఊహాగానం. తాను ఊహాగానం చేయడం కాదు.. తనకు శిక్ష పడితే అని జగన్‌ రెడ్డి స్వయంగా సన్నిహితుల వద్ద అంటున్నారట. అందుకే అధికార పార్టీలో రకరకాల ఊహాగానాలు మొదలయ్యాయట. తనకు శిక్ష పడితే ముఖ్యమంత్రిగా తన స్థానంలో  భార్య శ్రీమతి భారతీ రెడ్డి ఉంటారని జగన్ పార్టీ ముఖ్యులకు చెబుతున్నారట.

అయితే.. జగన్‌ రెడ్డికి శిక్షపడి ముఖ్యమంత్రి పదవికి రాజీనామా చేయవలసి వస్తే సీఎం కుర్చీలో తల్లి శ్రీమతి విజయలక్ష్మిని కూర్చోబెట్టాలని షర్మిల భావిస్తోందట. శ్రీమతి విజయలక్ష్మి కూడా ఇందుకు సుముఖంగానే ఉన్నారని ఆర్కే చెబుతున్నారు. సీబీఐ కేసులు ఒక కొలిక్కి వచ్చి జగన్‌ రెడ్డికి శిక్ష పడితే వైఎస్‌ఆర్‌ కాంగ్రెస్‌లో చీలిక ఏర్పడే అవకాశం ఉందని అధికార పార్టీకి చెందిన ముఖ్యుడొకరు విశ్లేషించినట్టు ఆర్కే రాసుకొచ్చారు. ఆ పరిస్థితి వస్తే కేంద్రంలో అధికారంలో ఉన్న భారతీయ జనతాపార్టీ ఏ వైఖరి తీసుకుంటుందన్నది కీలకం అవుతుందట. ఏదైనా ఆర్కే కాలజ్ఞానం ఈ వారం మాత్రం అదిరిపోయిందనే చెప్పాలి.