అధ్యక్షుడే సైలెంట్‌గా ఉండేసరికి ఏపీలోని జనసేన నేతలు కంటికి కనిపించడం లేదు. ఏ నియోజకవర్గంలో చూసిన టీడీపీ నేతలు, వైసీపీ మీద పోరాటం చేస్తున్నట్లు కనిపిస్తున్నారు గానీ, జనసేన నేతలు బయటకొచ్చి పోరాటం చేయడం ఎక్కువగా కనబడట్లేదు. ఇక కృష్ణా జిల్లాలో ఉన్న జనసేన నేతలది అదే పరిస్తితి. కానీ ఈ జిల్లాలో జనసేన తరుపున ఒక నాయకుడు మాత్రం సోలోగా ఫైట్ చేస్తున్నారు.

విజయవాడ వెస్ట్ ఇన్‌చార్జ్ పోతిన మహేష్ నిత్యం వైసీపీ ప్రభుత్వంపై పోరాటం చేస్తూనే కనిపిస్తున్నారు. గత ఎన్నికల్లో మహేష్ జనసేన తరుపున పోటీ చేసి 20 వేల పైనే ఓట్లు తెచ్చుకున్నారు. ఇలా ఘోరంగా ఓడిపోయినా సరే మహేష్ మాత్రం తన పోరాటాన్ని ఆపడం లేదు. ముఖ్యంగా మంత్రి వెల్లంపల్లి శ్రీనివాస్‌పై మహేష్ గట్టిగానే పోరాడుతున్నారు. వెల్లంపల్లి ఆలయాల్లో అనేక అక్రమాలకు పాల్పడుతున్నారని చెప్పి ఆరోపిస్తున్నారు. ప్రతిరోజూ ఏదొక విషయంపై మహేష్ స్పందిస్తూ, వెల్లంపల్లిని టార్గెట్ చేసి ముందుకెళుతున్నారు.

వెస్ట్ నియోజకవర్గంలో టీడీపీ యాక్టివ్‌గా లేకపోయినా సరే జనసేన తరుపున మహేష్ మాత్రం యాక్టివ్‌గా ఉంటూ వెల్లంపల్లి అవినీతి చేస్తున్నారంటూ విరుచుకుపడుతున్నారు. అలాగే ఇతర సమస్యలపై కూడా మహేష్ పోరాటం చేస్తున్నారు. జాబ్ క్యాలెండర్ పేరిట జగన్ నిరుద్యోగులని మోసం చేశారని చెప్పి మహేష్ నిరుద్యోగులకు మద్ధతుగా పోరాటం చేస్తున్నారు. ఇలా జనసేన నాయకుల్లో మహేష్ మాత్రం సోలోగానే ఫైట్ చేస్తూ ముందుకెళుతున్నారు. మరి ఈయన పోరాటం ఏ మేర వర్కౌట్ అవుతుందో చూడాలి.