ఈ రెండు పార్లమెంట్ స్థానాల్లో టీడీపీకి చాలా మైనస్ ఉంది. ఇంకా ఈ రెండుచోట్ల నాయకులు పుంజుకోలేదు. గత ఎన్నికల్లో ఒంగోలు పార్లమెంట్ స్థానంలో ఉన్న కొండపి అసెంబ్లీలో తప్ప, మిగతా అన్నీ స్థానాల్లో టీడీపీ ఓడిపోయింది. యర్రగొండపాలెం, మార్కాపురం, ఒంగోలు, గిద్దలూరు, కనిగిరి, దర్శి స్థానాల్లో టీడీపీ ఓటమి పాలైంది. అయితే ఎన్నికలై రెండేళ్ళు దాటేసింది. అయినా సరే ఆయా నియోజకవర్గాల్లో టీడీపీ పుంజుకోలేదు. చివరికి టీడీపీ గెలిచిన కొండపిలో కూడా వైసీపీ డామినేషన్ కనిపిస్తోంది.

ముఖ్యంగా ఈ అసెంబ్లీ స్థానాలకు ఇన్‌చార్జ్‌లుగా ఉన్న టీడీపీ నేతలు పెద్దగా యాక్టివ్‌గా పనిచేయడం లేదు. దీని వల్ల పార్టీకి మైనస్ అవుతుంది. అటు పార్లమెంట్ అధ్యక్షుడుగా ఉన్న నూకసాని బాలాజీ కూడా దూకుడుగా ఉండటం లేదు. దీంతో ఒంగోలు పార్లమెంట్‌లో టీడీపీకి బాగా మైనస్ ఉంది. అటు నెల్లూరు పార్లమెంట్ పరిధిలో కూడా టీడీపీది అదే పరిస్తితి. గత ఎన్నికల్లో ఈ పార్లమెంట్ పరిధిలో ఉన్న నెల్లూరు సిటీ, నెల్లూరు రూరల్, కందుకూరు, కావలి, కొవ్వూరు, ఉదయగిరి, ఆత్మకూరు స్థానాల్లో టీడీపీ ఘోరంగా ఓడింది.

ఇప్పటికీ ఆ స్థానాల్లో పార్టీ పుంజుకోలేదు. అయితే కొందరు నాయకులు పార్టీ తరుపున బాగానే కష్టపడుతున్నారు. కానీ నెల్లూరు పూర్తిగా వైసీపీ కంచుకోటగా ఉండటంతో పెద్దగా ఫలితం లేకుండా పోతుంది. కొందరు వైసీపీ ఎమ్మెల్యేల మీద వ్యతిరేకిత ఉన్నా సరే ఉపయోగించుకోలేని స్టేజ్‌లో టీడీపీ ఉంది. మొత్తం మీద చూసుకుంటే నెల్లూరు, ఒంగోలు పార్లమెంట్ స్థానాల్లో టీడీపీకి మైనస్ ఉందనే చెప్పొచ్చు.