కరోనా నేపథ్యంలో చాలామంది పేద, మధ్య తరగతి ప్రజలు ఆర్ధికంగా ఇబ్బందులు పడుతున్న విషయం తెలిసిందే. అలాగే చాలామంది కరోనాతో చనిపోవడం వల్ల, వారి కుటుంబాలు కష్టాల్లో ఉన్నాయి. ఇక ఇలాంటివారిని ఆదుకోవాలని చంద్రబాబు ఎప్పటినుంచో డిమాండ్ చేస్తున్నారు. రాష్ట్రంలో ప్రతి పేద, మధ్య తరగతి కుటుంబానికి పదివేలు సాయం చేయాలని, అలాగే కరోనా చనిపోయిన కుటుంబాలకు పది లక్షలని ఇవ్వాలని కోరుతున్నారు. ఇంకా చాలా డిమాండ్లు ప్రజలని ఆదుకునే విషయంలో జగన్ ప్రభుత్వం ముందు చంద్రబాబు పెట్టారు.

సరే పేదలని ఆదుకోమని చెప్పడం మంచి విషయమే. అటు జగన్ ప్రభుత్వం సైతం తమకు సాధ్యమైన మేర ప్రజలని ఆదుకునే ప్రయత్నం చేస్తుంది. పథకాలని కూడా బాగానే అందిస్తున్నారు. అయితే బాబు మాత్రం ఇంకా ఎక్కువగా ప్రజలకు అండగా నిలబడాలని కోరుతున్నారు. తాజాగా కరోనా వల్ల ఆర్ధికంగా దెబ్బతిన్న కుటుంబాలకు సాయం చేయాలని కోరుతూ బాబు దీక్షకు దిగారు.

దీక్ష చేయడంలో ఎలాంటి తప్పులేదు. కానీ పెద్ద సోఫా సెటింగ్స్, చుట్టూ కూలర్లు పెట్టుకుని, ఏదో ఆఫీసు టైమ్ మాదిరిగా 10 టూ 1 గంట వరకు దీక్ష చేయడమే విడ్డూరంగా ఉంది. ఇలాంటి దీక్షలు ప్రజల మధ్యలో చేస్తే అర్ధం ఉంటుంది. అలా కాకుండా కూలర్ల మధ్యలో దీక్ష చేస్తే ఎవరికి ఉపయోగం ఉంటుంది. కాబట్టి బాబు ఎప్పుడు ఇలా కాకుండా కొత్తగా ఆలోచించి ప్రజలకు మేలు చేసే కార్యక్రమాలు చేస్తే బాగుంటుంది.