ఇలా మండపేటలో హ్యాట్రిక్ విజయం సాధించిన వేగుళ్ళకు చెక్ పెట్టి వైసీపీ తొలివిజయం దక్కించుకుంటుందా? అంటే ప్రస్తుత పరిస్తితులని చూస్తే కాస్త అవుననే చెప్పొచ్చు. ఎందుకంటే ఎప్పుడైతే మండపేటలో తోట త్రిమూర్తులు ఎంట్రీ ఇచ్చారో, అప్పటినుంచి పరిస్తితి మారింది. గత ఎన్నికల్లో తోట టీడీపీ తరుపున రామచంద్రాపురం నుంచి పోటీ చేసి ఓడిపోయి, తర్వాత వైసీపీలోకి వచ్చారు. రామచంద్రాపురంలో వైసీపీ ఎమ్మెల్యే ఉండటంతో జగన్, తోటకు అమలాపురం పార్లమెంటరీ సమన్వయకర్తగా బాధ్యతలు ఇచ్చారు.

ఇదే సమయంలో మండపేటలో వేగుళ్ళ మీద పోటీ చేసి ఓడిపోయిన పిల్లి సుభాష్‌కు జగన్ ఎమ్మెల్సీ ఇచ్చి, మంత్రి పదవి ఇచ్చారు. కానీ మండలి రద్దు నేపథ్యంలో పిల్లి...ఎమ్మెల్సీ, మంత్రి పదవులకు రాజీనామా చేశారు. దీంతో ఆయనకు రాజ్యసభ ఇచ్చారు. ఈ క్రమంలోనే తోటకు మండపేట వైసీపీ బాధ్యతలు అప్పగించారు.

తోట ఎంట్రీతో మండపేటలో కాస్త వైసీపీకి అనుకూలంగా పరిస్థితులు మారాయి. పంచాయితీ, మున్సిపల్ ఎన్నికల్లో వైసీపీ సత్తా చాటింది. అసలు మండపేట మున్సిపాలిటీ మొదట నుంచి టీడీపీకి అనుకూలంగా ఉండేది. అలాంటి మున్సిపాలిటీలో తోట వైసీపీ జెండా ఎగిరేలా చేశారు. అలాగే ఇక్కడ సామాజికవర్గాల సమీకరణాలు తోటకు కలిసొస్తున్నాయి. ఇక్కడ కాపు ఓటింగ్ ఎక్కువ. తోట కూడా అదే వర్గానికి చెందిన నాయకుడు.