2019 ఎన్నికల్లో జగన్ వేవ్‌లో ఇక్కడ వైసీపీ నుంచి కొట్టు సత్యనారాయణ విజయం సాధించారు. టీడీపీ-జనసేనలు విడివిడిగా పోటీ చేయడంతో ఓట్లు చీలిపోయి వైసీపీకి అడ్వాంటేజ్ అయింది. అయితే ఇక్కడ ఎమ్మెల్యేగా గెలిచిన కొట్టు దూకుడుగానే ఉంటున్నారు. అలాగే ఆయనకు ప్రభుత్వ పథకాలు ప్లస్ అవుతున్నాయి. కాకపోతే ఎమ్మెల్యేపై అనేక ఆరోపణలు ఉన్నాయి. ఇసుకలో, ఇళ్ల స్థలాల్లో అక్రమాలకు పాల్పడ్డారని ఆరోపణలు వచ్చాయి. ఇవే ఎమ్మెల్యేకు మైనస్ అవుతున్నాయి.

ఎమ్మెల్యేకు మైనస్ ఉన్నా సరే ఉపయోగించుకోలేని స్థాయిలో టీడీపీ ఉంది. ఎందుకంటే ఇక్కడ టీడీపీకి నేతలు వరుసగా హ్యాండ్ ఇచ్చేస్తున్నారు. గత ఎన్నికల్లో పోటీ చేసి ఓడిపోయిన ఈలి నాని, ఇప్పుడు అధికార పార్టీ నేతలతో కలిసి తిరుగుతున్నారు. అటు టీడీపీలో ముందు నుంచి ఉన్న ముళ్ళపూడి బాపిరాజు సైతం పార్టీని పెద్దగా పట్టించుకోవడం లేదు. దీంతో చంద్రబాబు తాడేపల్లిగూడెం బాధ్యతలు వలవల మల్లిఖార్జునరావు(బాబ్జీ)కు అప్పగించారు.

తాడేపల్లిగూడెం బాధ్యతలు తీసుకున్న దగ్గర నుంచి బాబ్జీ టీడీపీలో దూకుడుగా పనిచేస్తున్నారు. ప్రజల సమస్యలని హైలైట్ చేయడంలో ముందున్నారు. కార్యకర్తలకు అండగా ఉంటున్నారు. అలాగే వైసీపీ చేసే అక్రమాలపై పోరాటం చేస్తున్నారు. ఇటీవలే లిక్కర్ షాపుల్లో వైసీపీ భారీగా అక్రమాలకు పాల్పడుతుందని, అటు ఎమ్మెల్యే అనుచరులు ఇసుకలో అవినీతికి పాల్పడుతున్నారని పెద్ద ఎత్తున ఆరోపణలు గుప్పిస్తున్నారు. ఇలా బాబ్జీ తక్కువ సమయంలోనే నియోజకవర్గంలో బాగా హైలైట్ అయ్యారు. మరి బాబ్జీ నెక్స్ట్ ఎన్నికల్లో తాడేపల్లిగూడెంలో టీడీపీని నిలబెడతారేమో చూడాలి.