గతంలో దళితులు టీడీపీ-కాంగ్రెస్‌లకు సమానంగా మద్ధతుగా ఉండేవారు. అయితే వైఎస్సార్ వచ్చాక పెద్ద సంఖ్యలో ఎస్సీ, ఎస్టీల మద్ధతు కాంగ్రెస్‌కు వచ్చింది. తర్వాత జగన్ ఎంట్రీతో దళితులు వైసీపీకి మద్ధతుగా వచ్చారు. గత ఎన్నికల్లో ఎక్కువగా దళితులు జగన్ వైపుకు వచ్చి వైసీపీని గెలిపించారు. పైగా ఎస్సీ, ఎస్టీ రిజర్వడ్ సీట్లలో టీడీపీ గెలిచింది ఒక్క కొండపిలో మాత్రమే. మిగతా అన్నీ సీట్లలో వైసీపీ గెలిచింది. అలా వైసీపీకి మద్ధతుగా ఉన్న దళితులని తమవైపుకు తిప్పుకునేందుకు చంద్రబాబు బాగా కష్టపడుతున్నారు.

జగన్ ప్రభుత్వం వచ్చాకే దళితులపై దాడులు పెరిగాయని ఆరోపణలు గుప్పిస్తున్నారు. అయితే జగన్ ప్రభుత్వంలో పలు సంఘటనలు జరిగాయి. సీతానగరంలో శిరోముండనం కేసు. చీరాలలో దళితుడిపై దాడి. అలాగే ఎస్సీ వర్గానికి చెందిన డాక్టర్ సుధాకర్ విషయం. రాజధాని అమరావతిలో దళితులపై దాడి చేశారని చెప్పి, అదే వర్గానికి చెందిన వారిపై ఎస్సీ, ఎస్టీ అట్రాసిటి కేసు పెట్టారు. ఇలా చెప్పుకుంటూ పోతే పలు ఘటనలు జరిగాయి.

ఇక వాటిని ఆధారంగా చేసుకునే జగన్ ప్రభుత్వం దళిత వ్యతిరేక ప్రభుత్వమని చంద్రబాబు విమర్శలు చేస్తున్నారు. తాజాగా టీడీపీకి చెందిన ఎస్సీ నాయకుడు వర్ల రామయ్య, జాతీయ షెడ్యూల్డ్ కులాల కమీషన్‌కు లేఖ రాశారు. ఏపీలో తరుచుగా దళితులపై దాడులు జరుగుతున్నాయని ఫిర్యాదు చేశారు. గత రెండేళ్లుగా జరుగుతున్న దాడులపై విచారించడానికి ప్రత్యేక బృందాన్ని రాష్ట్రానికి పంపాలని లేఖలో కోరారు. ఈ విధంగా ప్రతి విషయాన్ని తమకు అనుకూలంగా మార్చుకుంటూ దళితులని దగ్గర చేసుకునే ప్రయత్నం చేస్తున్నారు చంద్రబాబు. మరి చూడాలి బాబుకు ఎస్సీ, ఎస్టీల మద్ధతు ఏ మేర వస్తుందో?