మోడీ సీబీఎస్ఈ బోర్డుకు సంబంధించిన నిర్ణయం తీసుకోగానే అన్ని రాష్ట్రాలూ 2021 సంవత్సరానికి గాను వారి వారి బోర్డు పరీక్షలు రద్దు చేస్తూ నిర్ణయం తీసుకున్నాయని, అలాగే ఆంధ్రప్రదేశ్ ప్రభుత్వం మాత్రం విద్యార్థులకు పరీక్షలు నిర్వహించాలని విధంగా స్థిర నిర్ణయం తీసుకోగా ఈ పరీక్షలకు సుమారు 5 లక్షల మంది విద్యార్థులు హాజరు కావాల్సి ఉందని వివరించారు. అయితే నిన్న సుప్రీంకోర్టులో కేసు విచారణకు వచ్చిన సందర్భంగా తుది నిర్ణయం తీసుకుని జూన్ 24 లోపు తమకు వెల్లడించాలని ఆదేశించిందని అన్నారు. 

అయితే రాష్ట్రంలోని విద్యార్ధులను మానసిక వత్తిడికి గురి చేయకుండా తక్షణ నిర్ణయం తీసుకుని ఈరోజే ఆ నిర్ణయాన్ని సుప్రీం కోర్టుకు తెలియచేస్తే విద్యార్థులు కూడా టెన్షన్ లేకుండా ఉంటారని వెల్లడించారు. ఆంధ్రప్రదేశ్ లో పరీక్ష రాసేందుకు భౌతికంగా హాజరు కాబోతున్న 5 లక్షల మంది విద్యార్థులకు రాష్ట్ర ప్రభుత్వం కరోనా నుంచి రక్షించేందుకు ఎలాంటి చర్యలు తీసుకోబోతున్నదనేది మిలియన్ డాలర్ ప్రశ్న గానే మిగిలిపోయిందని రాజు లేఖలో పేర్కొన్నారు. ఏ ఒక్క విద్యార్థి కరోనా బారిన పడినా రాష్ట్ర ప్రభుత్వమే బాధ్యత తీసుకోవాలని సుప్రీంకోర్టు హెచ్చరించిన నేపథ్యంలో రాష్ట్రంలో విద్యార్ధులు కరోనా బారిన పడకుండా ఎలాంటి రక్షణ చర్యలు తీసుకుంటారో రాష్ట్ర విద్యాశాఖ మంత్రి కూడా స్పష్టం చేయాలని ఆయన డిమాండ్ చేశారు.