తాజాగా కూడా జగన్ ప్రభుత్వాన్ని చిరు పొగిడారు. జగన్ ప్రభుత్వం ఒక్కరోజులోనే 13 లక్షల 70 వేల మందికి టీకాలు వేశామని ప్రకటించింది. దీనిపై చిరు స్పందిస్తూ, ఇది తాను కూడా చూశానని, గొప్పగా చేసారంటూ జగన్ ప్రభుత్వంపై పొగడ్తల వర్షం కురిపించారు. ఇక ఇక్కడ నుంచే అసలు రచ్చ మొదలైంది. ప్రభుత్వం మంచి చేసినప్పుడు పొగడటంలో తప్పు లేదు గానీ, ప్రభుత్వం తప్పులు చేస్తే ప్రశ్నించాల్సిన బాధ్యత కూడా చిరుపైన ఉంటుందని విశ్లేషకులు అంటున్నారు.

పైగా అయిదురోజుల పాటు వ్యాక్సినేషన్ ఆపేసి ఒక్కరోజే వేసి రికార్డు అని ఏపీ ప్రభుత్వం చెప్పడం, దాన్ని చిరు పొగడటం కాస్త ఎబ్బెట్టుగా ఉన్నాయని అంటున్నారు. అయినా రాష్ట్రంలో చాలా సమస్యలు ఉన్నాయని వాటిపై చిరు పెద్దగా స్పందించిన సందర్భాలు లేవని అంటున్నారు. ఇప్పటికే నిరుద్యోగులు రాష్ట్ర వ్యాప్తంగా ఆందోళనలు చేస్తున్నారు. జాబ్ క్యాలెండర్ పేరిట జగన్ ప్రభుత్వం కేవలం 10 వేల ఉద్యోగాలకు నోటిఫికేషన్ ఇచ్చి మోసం చేశారని నిరుద్యోగులు మండిపడుతున్నారు.

అటు రాష్ట్రంలో పిల్లల పరీక్షల నుంచి రైతుల వరకు అనేక సమస్యలు ఉన్నాయి. కరోనా వల్ల చాలామంది ఆర్ధికంగా క్రుంగిపోయారు. కానీ ఇలాంటి సమస్యలపై చిరు సోషల్ మీడియాలో ఎందుకు స్పందించడం లేదని ప్రశ్నిస్తున్నారు. విశాఖ స్టీల్ ప్లాంట్ ప్రైవేటీకరణపై ఒకసారి స్పందించిన చిరు, అమరావతి రైతుల గురించి ఎందుకు పట్టించుకోవడం లేదని పలు రాజకీయ వర్గాలు ప్రశ్నిస్తున్నాయి.  మొత్తానికైతే ఏపీలో ఓ రాజకీయ వర్గం చిరుని గట్టిగానే రౌండప్ చేసినట్లు కనిపిస్తోంది.