మొత్తం నెలన్నార రోజుల్లో 500 కోట్ల రూపాయల మేర చేతులు మారే అవకాశాలు ఉన్నాయని కూడా చెబుతున్నారు. ఇప్పటికే కీలక ప్రజాప్రతినిధులు సైతం అక్కడ మకాం వేశారని అంటున్నారు.. అధికార పార్టీ నుంచి మంత్రి గంగుల కమలాకర్ అక్కడే మకాం వేసి ఉప ఎన్నికలకు సన్నద్ధం అవుతుండగా ఈటెల రాజేందర్ కూడా ఈ రోజు ఉదయం నుంచి గడపగడపకు ప్రచారం మొదలుపెట్టారు. అయితే ఈసారి జరుగుతున్న ఉప ఎన్నికలను దాదాపు రెండు పార్టీలు చాలా సీరియస్ గా తీసుకున్నాయి. 

తెలంగాణ రాష్ట్ర సమితి లో ఇప్పటిదాకా నెంబర్ 2 స్థానంలో ఉన్న ఈటెల రాజేందర్ ను అనూహ్యరీతిలో బయటకు పంపడం అనైతిక చర్య అని తెలంగాణ సమాజం భావిస్తున్నట్లు విశ్లేషణలు వినిపిస్తున్నాయి. ఈటల బీజేపీలో చేరడం అనేది తనను తాను రక్షించుకోవడం కోసమే కాక కెసిఆర్ మీద యుద్ధం చేయడానికి బీజేపీ సరైన అస్త్రం అని ఈటెల భావిస్తున్నట్లు చెబుతున్నారు. అలా ఒకప్పుడు బ్రాహ్మణుల పార్టీ అని పేరుపడిన బీజేపీ ఇప్పుడు బీసీ, ఎస్సీ, ఎస్టీల పార్టీగా మారబోతోందని అంటున్నారు. 

దీంతో ఈ అంశాన్ని సీరియస్ గా తీసుకున్న టిఆర్ఎస్ పార్టీ కూడా రేపటి నుంచి అభివృద్ధి పనులను పరుగులు పెడతాయి అని చెబుతూ ఊదర కొడుతోంది. అయితే ఇన్ని రోజుల పాటు అసలు హుజురాబాద్ అనే ఒక నియోజకవర్గం ఉందన్న సంగతి కూడా సోయే లేనట్లుగా ఇప్పటికిప్పుడు హుజురాబాద్ వరాల జల్లు కురిపించడం ఆసక్తికరంగా మారింది. ఇక ఈటెల అభిమానులైతే గంగుల కమలాకర్ ఈటెల రాజేందర్ ను తిట్టడం సహించడం లేదు. ఎప్పటికప్పుడు వాళ్ళు కౌంటర్లు వేస్తూనే ఉన్నారు. మొత్తం మీద ఈ ఖర్చు అంశం మాత్రం పెద్ద ఎత్తున చర్చనీయంశంగా మారింది.