అందులో ముఖ్యంగా నరసాపురం ఎమ్మెల్యే ముదునూరి ప్రసాద్ రాజుకు కేబినెట్‌లో చోటు దక్కడం ఖాయమని ఎప్పటినుంచో పశ్చిమ గోదావరి జిల్లా రాజకీయాల్లో ప్రచారం జరుగుతుంది. ఎందుకంటే ప్రసాద్ రాజు, జగన్‌తో అత్యంత సన్నిహితంగా ఉంటారు. జగన్ కోసం 2012లో ఎమ్మెల్యే పదవిని సైతం త్యాగం చేశారు. 2009లో కాంగ్రెస్ తరుపున ఎమ్మెల్యేగా గెలిచిన ప్రసాద్, తర్వాత వైఎస్సార్ మరణం, జగన్ పార్టీ పెట్టడంతో, ఎమ్మెల్యే పదవికి, కాంగ్రెస్‌కు రాజీనామా చేసి వైసీపీలోకి వచ్చేశారు.

ఈ క్రమంలోనే 2012లో జరిగిన నరసాపురం ఉపఎన్నికలో వైసీపీ తరుపున పోటీ చేసి ఓడిపోయారు. 2014లో ఆచంట నుంచి పోటీ చేసి ఓటమి పాలయ్యారు. ఇక 2019 ఎన్నికల్లో మళ్ళీ నరసాపురంలో పోటీ చేసి ప్రసాద్ వైసీపీ తరుపున గెలిచారు. అయితే మొదట్లోనే ప్రసాద్‌కు మంత్రి పదవి వస్తుందని అనుకున్నారు. కానీ అనూహ్యంగా జిల్లాలో ఉన్న ఆచంట ఎమ్మెల్యే చెరుకువాడ రంగనాథరాజుకు పదవి దక్కింది. కానీ ఈ సారి మాత్రం చెరుకువాడ ప్లేస్‌లోకి ముదునూరి వస్తారని టాక్. మరో ఆరు నెలల్లో మంత్రివర్గంలో మార్పులు జరగనున్నాయి. జగన్ మరోసారి కులాలు, జిల్లాలు, పనితీరు ఆధారంగా మంత్రి పదవులు ఇవ్వనున్నారు.

ఈ క్రమంలోనే చెరుకువాడ ప్లేస్‌లో ప్రసాద్ రాజుకు ఛాన్స్ ఇవ్వొచ్చని తెలుస్తోంది. ఇప్పటికే నరసాపురం ఎంపీ రఘురామకృష్ణంరాజు వ్యవహారంలో పార్టీకి కాస్త ఇబ్బంది తలెత్తింది. జిల్లాలో ఉన్న క్షత్రియ సామాజికవర్గానికి వైసీపీపై వ్యతిరేకిత పెరుగుతుంది. ఇప్పుడు మంత్రిగా రంగనాథరాజు ఉన్నా సరే, అంతగా పార్టీకి బెన్‌ఫిట్ వచ్చినట్లు కనిపించడం లేదు. అదే నరసాపురం పరిధిలో మంచి ఫాలోయింగ్ ఉన్న ప్రసాద్ రాజుకు పదవి వస్తే, కాస్త లబ్ది చేకూరుతుందని తెలుస్తోంది. మొత్తానికైతే ప్రసాద్ రాజుకు కేబినెట్ బెర్త్ ఫిక్స్ అయినట్లే ఉంది.