అయితే మరికొన్ని రోజుల్లో టీడీపీలో మరికొన్ని వికెట్లు పడతాయని తెలుస్తోంది. అది కూడా టీడీపీకి సపోర్ట్‌గా ఉన్న ఎమ్మెల్సీలు. ఏపీ అసెంబ్లీలో వైసీపీకి బలం ఉంటే, శాసనమండలిలో టీడీపీకి బలం ఉన్న విషయం తెలిసిందే. ఆ బలంతోనే గత రెండేళ్లుగా జగన్ ప్రభుత్వానికి చెక్ పెడుతున్నారు. అలాగే కీలకమైన మూడు రాజధానుల బిల్లు విషయంలో కూడా బ్రేక్ వేశారు. అందుకే జగన్ మండలి రద్దుకు ప్రతిపాదించి కేంద్రానికి బిల్లు పంపారు.

అయితే ఇప్పటికీ మండలి రద్దు ప్రక్రియ పూర్తి కాలేదు. అసలు ఆ ప్రక్రియ ఇప్పుడు ఎక్కడ ఉందో? పూర్తి అవుతుందో లేదో కూడా తెలియదు. ఇక మండలి ఏపీలో ఇంకా ఉంది కాబట్టి, ఎమ్మెల్సీల ఎంపిక జరుగుతూనే ఉంది. మండలి రద్దు ప్రక్రియ మొదలయ్యాక పలువురు ఎమ్మెల్సీలుగా ఎన్నిక అయ్యారు. అలాగే కొన్ని రోజుల్లో ఇంకా ఎమ్మెల్సీల ఎన్నిక జరగనుంది. టీడీపీకి సంబంధించి దాదాపు 10 మందికి పైనే ఎమ్మెల్సీల పదవీకాలం పూర్తి కానుంది. ఇప్పటికే మండలి ఛైర్మన్ షరీఫ్ పదవీకాలం సైతం పూర్తి అయింది.

దీంతో ఖాళీలు అయిన ఆ ఎమ్మెల్సీ పదవులన్నీ వైసీపీకి దక్కనున్నాయి. అలాగే మండలిలో టీడీపీ బలం తగ్గిపోయి, వైసీపీకి బలం పెరుగుతుంది. ఛైర్మన్ కూడా వైసీపీకి సంబంధించిన వ్యక్తే ఎన్నిక కానున్నారు. అయితే ఎమ్మెల్సీ పదవీకాలం పూర్తి అయిన టీడీపీ నేతలు, మళ్ళీ పదవి ఆశించి, వైసీపీ వైపుకు చూసే అవకాశాలు కూడా లేకపోలేదని తెలుస్తోంది. ప్రస్తుతం ఉన్న పరిస్తితులో టీడీపీ వీక్‌గా ఉంది కాబట్టి తమ రాజకీయ భవిష్యత్ బాగుండాలని వైసీపీలోకి జంప్ చేసే ఛాన్స్ ఉంది. మరి చూడాలి రానున్న రోజుల్లో టీడీపీలో ఎన్ని వికెట్లు పడతాయో?